“Məqsəd odur ki, heç kəs müəyyən şəxslərin təsdiqini almayınca prezidentliyə namizədliyini irəli sürə bilməsin”
İran prezidenti Mahmud Əhmədinejad parlamentdə prezident seçkisi qanununa edilən düzəlişə kəskin etiraz bildirib.
Dekabrın 2-də edilən düzəlişə əsasən, prezidentliyə namizədliyini irəli sürən hər kəsin 8 il nazir stajı olmalı, yüksək vəzifələrdə çalışmış 300 nəfər isə onun idarəçiliklə bağlı qabiliyyətini təsdiqləməlidir.
“Media forum” saytının məlumatına görə, Əhmədinejad deyib ki, parlamentin prezident seçkisi qanununa etdiyi düzəliş ölkə konstitusiyasına ziddir: “Bir qrupun durub “Xalq öz mənafeyini ayırd etmək qabiliyyətinə malik deyil, onun məsləhətini biz müəyyən etməliyik” deməsi düzgün deyil və yolverilməzdir. Xalqın pulu və vaxtı belə layihələrə sərf olunmamalıdır. Belə olsa, o zaman konstitusiyaya nə ehtiyac var ki? Bu, ölkə konstitusiyasına zidd addımdır. Məqsəd isə odur ki, heç kəs müəyyən şəxslərin təsdiqini almayınca prezidentliyə namizədliyini irəli sürə bilməsin. Halbuki prezidentliyə namizədliyini irəli sürmək istəyən hər kəs xalqın əl-qolunu bağlamaq əvəzinə yaxşı olar onun rəyini qazanmağa çalışsın”.
