Sabiq rektorla bağlı uydurma xəbər və vəkilin ironiyası
Fəaliyyəti dayandırılmış Azərbaycan Beynəlxalq Universitetinin rektoru Elşad Abdullayevin Bakıya gəldiyi haqda bəzi saytlarda məlumat yayılıb. Məlumatda iddia olunur ki, son vaxtlar qalmaqallı videogörüntülər yaymaqla gündəmdə olan Elşad Abdullayev dekabrın 3-də saat 12:50 radələrində Bakı Beynəlxalq Hava Limanında olub. Guya sabiq universitet rektoru qara rəngli “Mercedes” markalı avtomobillə hava limanını tərk edib, hazırda şəhərdədir.
“Elşad Abdullayevin sabiq millət vəkili Gülər Əhmədova, Bakı Ağır Cinayətlər Məhkəməsinin hakimi Ağababa Babayev və digər məmurlarla bağlı yaydığı videogörüntülər və qardaşı, Milli Təhlükəsizlik Nazirliyinin sabiq mayoru Mahir Abdullayevin oğurlanması işi ilə bağlı dindirləcəyi bildirilir. Mənbənin məlumatına görə, Elşad Abdullayev öz razılığı ilə Bakıya gəlib və onun təhlükəsizliyinə tam təminat verilib”, – deyə məlumatda bildirilir.
Abdulayevin vəkili Adil İsmayılov isə əməkdaşımızla söhbətdə bu məlumatın uydurma olduğunu, bununla bağlı özünün facebook səhifəsində qeyd də yazdığını deyib. Vəkilin ironiya ilə yazdığı qeyd belədir:
“Beynəlxalq Universitetin sabiq rektoru, Elşad Abdullayevin Bakıda olub olmaması ilə bağlı yayılan xəbəri şərh edərək bildirmək istəyirəm ki , Elşad Abdullayev bu gün səhər piyada Bakıya yola düşüb, özü ilə çoxlu sayda video da gətirir”.
