Ölkə başçısı Vladimir Putini razı salacaqmı?
Xəbər verildiyi kimi bir neçə gün əvvəl Rusiya prezidenti Vladimir Putin Azərbaycanın dövlət başçısı Ilham Əliyevə zəng edib. Onların telefon danışıqları barədə mətbuatda müxtəlif məlumatlar yayılıb. “Azadlıq”a daxil olan xəbərlərdə isə deyilir ki, Vladimir Putinin Ilham Əliyevə zəng etməsi dekabrın 5-də Türkmənistanın paytaxtı Aşqabadda keçiriləcək MDB dövlət başçılarının növbəti sammiti ilə əlaqədar olub.
Rusiya prezidenti sammitdə Ilham Əliyevdən iki ölkə arasında həll olunmamış məsələlərlə bağlı qəti mövqe gözlədiyini bildirib. Xüsusilə Rusiyanın təşəbbüsü ilə yaradılan Gömrük Ittifaqı ilə bağlı Ilham Əliyevin qəti mövqe bildirməsi Vladimir Putin üçün əhəmiyyətlidir. Yada salaq ki, Rusiya prezidenti hələ bir müddət əvvəl Gömrük Ittifaqına qoşulmağa tərəddüd edən MDB dövlət başçılarına ilin sonuna qədər vaxt vermişdi.
Beləliklə, Aşqabad sammitindən sonra Rusiya-Azərbaycan münasibətlərinin yeni dönəminin başlanacaq. Əgər Ilham Əliyev iki ölkə arasında həll olunmamış məsələlərlə, eyni zamanda Gömrük Ittifaqı ilə bağlı Vladimir Putini razı salan mövqe bildirəcəksə, o zaman Bakı və Moskva arasında soyuqluq aradan qalxacaq. Əks təqdirdə münasibətlər daha da kəskinləşəcək və Rusiya Azərbaycan hakimiyyətinə təzyiqlərini daha da sərtləşdirəcək.
Namiq
