Prezident Administrasiyasına son təyinatların «pərdəarxası»
Prezidentin noyabrın 30-da imzaladığı sərəncamlarla Prezident Administrasiyasının şöbə müdirləri Novruz Məmmədov, Zeynal Nağdəliyev və prezidentin köməkçisi Əli Əsədov və prezidentin hərbi və təhlükəsizlik məsələləri üzrə köməkçisi general-leytenant Vahid Əliyev Prezident Administrasiyası rəhbərinin müavinləri təyin ediliblər.
Azərbaycanın Tacikistandakı keçmiş səfiri, bundan əvvəl isə Bakı polisinin rəisi olan Məhərrəm Əliyev isə noyabrın 30-da Prezident Administrasiyasının müdafiə məsələləri şöbəsinin müdiri təyin edilib. Bir sıra ekspertlər Prezident Administrasiyasına son təyinatları hökumətdə gələcək dəyişikliklərdən və 74 yaşlı Ramiz Mehdiyevin postdan getməsinin mümkünlüyü fonunda hakim rejimin sabitliyi saxlamaq cəhdindən xəbər verdiyini deyirlər.
AXCP sədrinin müavini Asəf Quliyev hesab edir ki, maraqlı məqamlardan biri hökumət tərəfindən “vurularaq” Azərbaycandakı siyasi proseslərdən uzaqlaşdırılan Məhərrəm Əliyevə yenidən vəzifə verilməsidir: “Birdən-birə Məhərrəm Əliyevin bu vəzifəyə təyin edilməsi suallar doğurmaya bilmir. Başqa bir məqam son vaxtlar Paşayevlərlə Naxçıvan klanı arasında mübarizənin dərinləşməsidir. Yeni təyinatlar da məhz naxçıvanlıların hakimiyyət tərəfindən ”vurulması”ilə də bağlı ola bilər. Bu yolla naxçıvanlıları bir növ sakitləşdirməyə çalışa bilərlər. Bu, Ramiz Mehdiyevin öz iradəsi ilə də ola bilər. Bəlkə də Mehdiyev bu yolla ətrafını gücləndirmək istəyir. Paşayevlərlə mübarizə fonunda naxçıvan klanın gücləndirmək planları ola bilər”.
Müsavat başqanının müavini Tofiq Yaqublu yeni təyinatları çox ciddi siqnal kimi qiymətləndirir: “Prezident Administrasiyasının rəhbəri uzun illər müavinlərsiz işləyib. Indi dörd nəfərin ona müavin təyin edilməsi hakimiyyət daxilindəki gərginlikdən, yaxınlaşan 2013-cü il seçkilərindən və özünə əmin olmamaqdan irəli gəlir. Bunu ötən seçkilərdə niyə etmədilər? Çünki bu dəfə çox çətin və pis vəziyyətə düşüblər. Artıq dünya korrupsioner, kriminal rejimləri dəstəkləmir. Bilirlər ki, seçki öncəsi basqılar artacaq və komandaları vaxtından əvvəl çökə bilər. Ona görə də özlərini xilas etmək üçün çabalar göstərməyə başlayıblar. Son təyinatlar da belə çabalardan biridir”.
Açıq Cəmiyyət Partiyasının sədri Sülhəddin Əkbər bu təyinatları Prezident Administrasiyasında köklü dəyişikliklərə hazırlıq kimi dəyərləndirib. S.Əkbər bu təyinatlarda Administrasiyasının ictimai-siyasi şöbəsinin müdiri Əli Həsənovun adının keçməməsinin diqqət çəkdiyini xatırladıb(“Turan”).
ADP sədri Sərdar Cəlaloğlunun fikrincə, bu təyinatlarla rejim indiki “status-kvo”nu saxlamaq mövqeyini nümayiş etdirib. Və bu, heç bir halda ölkədə demokratiyanın inkişafına xidmət etmir. Onun sözlərinə görə, mövcud iqtidar bununla “səmərəli idarəetmə pilləsi” yaratmaq cəhdi göstərib. ADP sədri əlavə bir idarəetmə pilləsinin yaradılmasını rüşvətin artmasına, vətəndaşların hüquq və azadlıqlarının daha çox tapdanmasına xidmət edəcəyini bildirib.
