YAP-ın icra katibinin müavini partiyadaşı Musa Musayevin fikirlərinə münasibət bildirib. Xatırladaq ki, hakim partiyanın Siyasi Şurasının üzvü olan Musa Musayev moderator.az saytına açıqlamasında təşkilatda Ilham Əliyevin 2013-cü il prezident seçkisində namizədliyi ilə bağlı tərəddüdlərin olduğunu bildirmişdi:
“Mən YAP-dan Ilham Əliyevdən başqa namizəd görmürəm. Amma bəzi YAP-çılar Ilham Əliyevin namizədliyi ilə bağlı suallara tərəddüdlü cavab verir. Bu məni çox təəccübləndirir. Hesab edirəm ki, YAP Ilham Əliyevin prezidentliyə namizədliyini elan etməlidir”.
Siyavuş Novruzov isə “Bizim Yol”a bildirib ki, Musa Musayevin dedikləri doğru deyil: “YAP-ın mərkəzi aparatında oturan bizik. Rayon təşkilatları ilə işləyən də bizik. Bu gün partiyamızda heç bir tərəddüd yoxdur. Ilham Əliyevin YAP-ın prezidentliyə namizədi olması da şübhəsizdir. Indi o, niyə belə deyir, mən anlamıram. Belə çıxır ki, Musa Musayev münəccimlik edir. Ona bu təəsürat hardandır mən bilmirəm”.
Siyavuş Novruzovun fikirləri ilə bağlı Musa Musayevin mövqeyini öyrənmək mümkün olmayıb.
