Daha bir alman qəzeti, tiracı 160 mini aşan “Frankfurter Rundschau” Azərbaycana diqqət ayırıb. Qəzetin müxbiri Christian Siepmann ötən ay Azərbaycana səfərinin icmalını yazıb. “Frankfurter Rundschau”dakı məqalədə Azərbaycan söz və fikir azadlığını boğan, vətəndaşların fundamental hüquqlarına hörmətsiz yanaşan idarəetmə altında olan ölkə kimi təsvir edilib.
Məqaləsində o, əməkdaşımız Natiq Ədilovun (Güləhmədoğlu) fikirlərinə geniş yer ayırıb. Əməkdaşımız bildirib ki, Azərbaycanda, xüsusən Bakıda yaradılan zahiri gözəlliyin arxasında böyük fəlakətlər gizlədilir. Bakıdan azacıq kənarda əyalətlərdə infrastruktur, əhalinin yaşayışı, kommunikasiya bərbad vəziyyətdədir.
Christian Siepmann ölkədəki korrpusiyanın şəbəkələnməsini də Natiq Ədilovun sözləri ilə təsvir edib. Qeyd edilir ki, Azərbaycanda xırda “JEK” iadərlərindən nəhəng dövlət orqanlarına qədər hər yeri rüşvət və korrupsiya bürüyüb və bu naqis əməl özfəaliyyət yox, Ilham Əliyev səviyyəsində dəstəklənən dövlət siyasətidir.
Alman həmkarlarımız “Azadlıq” qəzetinin üzləşdiyi duruma da diqqət ayırıb. Məmurların sifarişli məhkəmə hökmləri ilə qəzeti çöküdürməyə çalışdığını, “Azadlıq” qəzetinin ofisindən qanunsuz yolla çıxarıldığını və qeyri-əlverişsiz vəziyyətdə çalışmağa məcbur etdiyi oxuculara çatdırılıb.
