Bu gün tanınmış hüquqşünas, görkəmli ziyalı, Hüquq Maarifçiliyi Cəmiyyətinin Prezidenti İntiqam Əliyevin 50 illik yubileyidir. Bu münasibətlə AXCP sədri Əli Kərimli İntiqam Əliyevi təbrik edib. Təbrikdə deyilir:
İntiqam bəy ölkəmizdə minlərlə hüququ pozulan insanın müdafiəçisi, daim haqqın, həqiqətin yanında olan ləyaqətli aydınımız, zülmə, ədalətsizliyə qarşı mübarizə əzmli əsl vətəndaş, yeni nəsil savadlı hüquqşünasların ustadıdır. Son illər mövcud anti-demokratik rejimdə sifarişli məhkəmələrin ədalətindən ümidini kəsən çoxsaylı vətəndaşlarımızın Avropa Məhkəməsində siyasi, mülkiyyət, söz azadlığı hüquqlarının təminatı, bərpa olunması naminə əlindən gələni edən İntiqam bəy onların ümid və etimad bəslədiyi şəxsiyyət kimi ikiqat nüfuz sahibi olub. Belə mərd, mübariz, alicənab ziyalılarımız xalqımız tərəfindən yüksək dəyərləndirilir.
Hörmətli İntiqam bəy!
Sizi 50 illik yubileyiniz münasibətilə səmimi qəlbdən təbrik edir, vətənimizdə demokratiyanın, hüququn aliliyinin bərpası və bərqərar olması naminə göstərdiyiniz misilsiz xidmətinizlə qürur duyur, bu yolda sizə böyük uğurlar, cansağlığı, uzun ömür və amallarınızın həyata keçməsini arzulayıram.
