Universitet rəhbərliyi Elnur Məcidlinin müraciətini cavablandırmır
Bu ilin mayında bir illik həbsdən sonra azadlığa çıxan AXCP Gənclər Komitəsinin Elnur Məcidli təhsil hüququnu hələ də bərpa edə bilməyib. E.Məcidli Qərb Universitetinin “Siyasi elmlər” fakültəsində təhsil alırdı. Həbsi ilə əlaqədar təhsili yarımçıq qalan E.Məcidli sonradan universitetə bərpa olunmaq istəsə də, cəhdləri boşa çıxıb.
Atası Arzuman Məcidlinin sözlərinə görə, həbs olunduğu üçün oğlunun bir neçə fənndən kəsiri qalıb. Sonradan universitet rəhbərliyinə Elnurun həmin fənnlərdən yenidən imtahan verməsini və təhsil haqqını köhnə qaydada ödəməsini xahiş etsələr də, məsələ bu günə qədər açıq qalıb: “Biz təhsil haqqını yeni qaydada ödəyə bilmərik. Buna maddi imkanımız yoxdur. Köhnə qayda ilə ödəniş etməyimizlə isə rəhbərlik razılaşmır. Ona görə məsələ bu günə qədər həllini tapmayıb. Mən çox təəssüf edirəm ki, Azərbaycan hakimiyyətinin bu repressiv siyasəti nəticəsində ölkə gəncləri bu cür çətin və çıxılmaz durumla üz-üzə qalmalı olublar”.