Əli Laricaninin Türkiyə səfərinin detalları açıqlandı
Iran parlamentinin sədri Əli Laricaninin Türkiyə səfərinin bəzi detalları açıqlanıb. APA-nın “Fars” xəbər agentliyinə istinadən məlumatına görə, Ə.Laricaninin Türkiyə səfəri zamanı nümayəndə heyətinin tərkibində olan Iran parlamentinin milli təhlükəsizlik və xarici siyasət komissiyasının sədr müavini Mənsur Həqiqətpur deyib ki, rəsmi Tehran Ankaranın diqqətinə Suriya məsələsində səhv addım atdığını çatdırıb:
“Səfər çərçivəsində Türkiyənin bir sıra rəsmi şəxsləri ilə görüşlər keçirildi. Ə.Laricani Iranın Suriyadakı böhranı həll etmək üçün kömək etməyə hazır olduğunu bildirdi. Eyni zamanda Iran parlamentinin sədri Türkiyənin Suriya ilə sərhədə “Patriot” raketləri yerləşdirmək istəyinə və Suriya müxalifətinə kömək etdiyinə görə bu ölkənin baş nazirinə xəbərdarlıq etdi. Ə.Laricani “Patriot” raketləri mövzusunda hər iki ölkənin rəsmilərinin iştirakı ilə Tehranda bir toplantı keçirilməsini təklif etdi. Rəcəb Tayyib Ərdoğan da onun bu təklifini qəbul etdi”.
Türkiyə mətbuatı isə Ə.Laricani və R.T.Ərdoğan arasında 1 saat 45 dəqiqə davam edən görüşlə bağlı yazıb ki, Iran rəsmisi “Suriyada dəyişiklik olmalıdır. Amma bu dəyişiklik ABŞ və Qərbin istədiyi şəkildə deyil, mərhələ-mərhələ həyata keçirilməlidir. Keçid dövrünə isə Bəşər Əsəd rəhbərlik etməli və Suriyada yeni bir dövrün yaranmasında yalnız sünnilər söz sahibi olmamalıdır”, -deyə söyləyib.
Iran parlamentinin sədri “Patriot” raketləri ilə bağlı narahatlığını bildirdikdə, R.T.Ərdoğan “Nə bu raketlər, nə də Malatyadakı raket əleyhinə müdafiə sistemi sizə və ya başqa bir ölkəyə qarşıdır. Sadəcə, NATO-dakı üzvlüyümüzdən istifadə edərək tamamilə öz ölkəmizi və insanlarımızı qorumağa yönəlmiş bir addımdır”, – deyə vurğulayıb.
Bundan əlavə, görüşdə Iranın mübahisəli nüvə proqramının da müzakirə edildiyi qeyd olunub. Belə ki, Türkiyənin baş naziri “Vəziyyət nə yerdədir” sualına Ə.Laricani “Iranın nüvə fəaliyyətləri tamamilə dinc məqsədlərə yönəlib, nüvə başlığı daşıyacaq raket istehsal etmək kimi bir planımız yoxdur”,- deyə cavab verib.
