FHN-nin təqdim etdiyi rəqəmlər real qiymətlərdən 2-2,5 dəfə çoxdur
Oqtay Gülalıyev: «Rəqəmlər korrupsiyadan xəbər verir»
Bir müddət əvvəl “Kür” Vətəndaş Cəmiyyəti Qərargahı Qax-Zaqatala bölgəsində baş vermiş zəlzələ ilə bağlı araşdırma-hesabatı təqdim edib. Hesabatda diqqət çəkən məqamlardan biri zəlzələ bölgəsində tikilən evlərə çəkilən xərcin məbləği ilə bağlıdır. Belə ki, Qax-Zaqatala zəlzələ bölgəsində evlərin bir kvadratmetrinin 500 manata tikildiyi məlum olub.
Bunu zəlzələ bölgəsində çalışan şirkətin nümayəndələri də təsdiqləyib. Bu qiymət isə təxminən Bakıda Yasamalda və Əhmədlidə tikilən evlərin qiymətinə bərabərdir. Nəzərə almaq lazımdır ki, paytaxtdan fərqli olaraq zəlzələ bölgəsində evlər tikilərkən torpaq, tikinti üçün icazə almağa, həmçinin müəyyən strukturlara verilən rüşvət də daxil olmaqla digər xərclərə ehtiyac olmayıb. Hətta bunlar olsaydı belə əyalətdə mənzilin bir kvadratmetrinin 500 manata başa gəlməsi inandırıcı olmazdı. Qiymətlərin bu qədər şişirdilməsi isə yenə də korrupsiyadan xəbər verir.
Əslində isə zəlzələ bölgəsində ev tikintisi neçəyə başa gələ bilərdi?
“Əmlak bazarı iştirakçıları” Ictimai Birliyinin icraçı direktoru Ramil Osmanlı monitorinq aparmadan dəqiq rəqəmlər açıqlamağa çətinlik çəkdiyini bildirdi. Lakin o, zəlzələ bölgəsində inşa edilən evlərin qaçqın və məcburi köçkünlər üçün inşa olunan şəhərciklərdən ucuz başa gəldiyini də qeyd etdi. Bu da bir daha bu tip layihələrdə korrupsiyanın miqyasını göstərir.
“Kür” Qərargahının koordinatoru Oqtay Gülaliyev isə artıq iki ildir bu məsələnin müzakirə obyekti olduğunu deyir. Kür daşqınları baş verən ərəfədən “Kür” Vətəndaş Cəmiyyəti qərargahı bölgələrdə Fövqəladə Hallar Nazirliyinin xətti ilə tikilən evlərin qiymətinin araşdırlıması üçün dəfələrlə adı çəkilən nazirliyə müraciət edib və rəsmi sorğu göndərib. O.Gülalıyevin sözlərinə görə, sorğulara cavab verilmədiyindən məhkəməyə müraciət etməli və eyni zamanda araşdırmalara başlamalı olublar. Prosesə müstəqil ekspertlərdən və qiymətləndirmə şirkətlərinin nümayəndələri də cəlb edilib. Məlum olub ki, Sabirabad və Saatlıda iki otaqlı ev təxminən 19 min 500 manata, 3 otaqlı ev isə 24 min manata başa gəlir. Fövqəladə Hallar Nazirliyinin xətti ilə Zaqatalada iki otaqlı evlərin tikintisi 45 min manata, 3 otaqlı evlərin tikintisi 63 min manata başa gəlir. Bu da real qiymətlərdən 2-2,5 dəfə artıqdır və reallıqdan uzaqdır. Bu da korrupsiyadan xəbər verir.
Fizzə
