“Daily Mail” hakim ailənin dəbdəbəli həyat tərzi və bahalı xərcləmələrindən yazdı
“Heç kim bilmir ki, Azərbaycanın heyrətamiz neft sərvətinin nə qədəri İlham Əliyevin, onun dostlarının və müftəxorlarının bank hesablarına axır”
Britaniyanın nüfuzlu “Daily Mail” qəzetinin həftəsonu əlavəsi olan “The Mail on Sunday” İlham Əliyev, onun ailəsi və yaxın ətrafının zəngin və dəbdəbəli həyat tərzindən bəhs edən məqalə dərc edib. Məqalədə Azərbaycan neft pullarının Əliyevlərin cibinə axdığı bildirilir və belə bir suala cavab axtarılır ki, bu ölkənin “çirkli zənginləri” ilə Britaniyanı nə birləşdirir.
Məqalənin iri və maraqlı sərlövhəsi var: “Çirkli zənginlər: Britaniyanın sevimli diktatorluğunun o qədər nefti var ki, onun varisləri bu neftdə çimirlər… Lakin Azərbaycanın nağılvari sərvətinin altından çox bulanıq sirlər pırtlayır”.
Müəllif Vill Stevart məqaləsinə ikinci sərlövhə kimi bunu seçib: “Neft ötən il 19 milyard funt sterlinq gəlir gətirib, lakin ehtimal olunur ki, bu pulun çox hissəsi birbaşa prezident İlham Əliyevin və onun ailəsinin ciblərinə axıb”.
Məqalədə yazılır:
“Qədim Misir hökmdarı Kleopatra öz vücudunun gözəlliyini hifz etmək üçün uzunqulaq südündə çimərmiş. Azərbaycanın paytaxtı Bakıda isə bundan da qəribə müalicə təklif olunur. Xanımlar Gucci və ya Oscar de la Renta geyimlərini soyunaraq bir vaxtlar Marko Polonun inandığı kimi 40 dərəcəyədək qızdırıldıqda dəri xəstəliklərindən, yel xəstəliyindən, artritdən və hətta əsəbdən müalicə etdiyi deyilən xam neft vannalarına girirlər.
Tibb elmi isə deyir ki, belə vannada 10 dəqiqədən artıq qalan insan özünü karsirogen təsirə məruz qoyur.
İpək Yolunun Dubayı olmaq istəyən lovğa şəhər
Neft Bakıda hər yerdədir, hətta spa salonlarında da. Xəzər dənizinin buruqlar uzanan zonasında və dənizin dərinliklərində isə daha çoxdur. Neft bir zamanlar tozlu küçələri və milli xalçaları ilə məşhur olan qədim şəhərdə hər şeyi dəyişir, onu təəccüb doğuracaq dərəcədə lovğa şəhərə çevirir.
Bakı İpək yolunun Dubayı olmaq uğrunda açıq şəkildə rəqabət aparır. Bu ilin əvvəllərində o, öz ətrafında fırlanan möhtəşəm lazerləri ilə insanları heyran edən “Crystall Hall”da keçirilmiş “Eurovision” mahnı müsabiqəsinə ev sahibliyi etmişdi. 2019-cu ildən sonra isə, belə iddia olunur ki, dünyadakı ən hündür binaya sahib olmaqla fəxr edəcək. Bu, 1.25 milyard funt sterlinq dəyərində, 189 mərtəbə ilə səmaya yüksələcək “Azərbaycan Qülləsi” olacaq. Bu isə Dubaydakı “Bürc Xəlifə”dən – hazırda rekord kimi qeyd edilən binadan təxminən 30 faiz daha hündürdür. Hərçənd, söhbət zəlzələyə meyilli zonada yerləşən regiondan gedir.
Əliyevlərin sərvəti
Heç kim bilmir ki, Azərbaycanın heyrətamiz neft sərvətinin nə qədəri 50 yaşlı prezident İlham Əliyevin, onun dostlarının və müftəxorlarının bank hesablarına axır. Lakin inamla demək olar ki, onlar təsəvvür edilməz dərəcədə varlıdırlar. Müstəqil təhqiqatın təxminlərinə görə, dövlət neft və qaz şirkəti olan SOCAR əhalisi 10 milyon nəfərdən də az olan ölkədə ötən il 19 milyard funt sterlinq gəlir əldə edib.
Əliyev özü Rusiyada təhsil alıb, lakin qızları Leyla və Arzunu Londonda illik təhsil haqqı 15 min funt sterlinq olan Kraliça Qızlar Kollecinə göndərib.
Bu gün Əliyeva bacıları Dubay, Paris və Londonda 50 milyon funt sterlinq dəyərində mülkiyyət portfelinə malik olub, tikintidən gələn faizləri anaları ilə bölüşürlər.
Deyilənlərə görə, Leylanın biznes imperiyasına gəlirli hava yolları şirkəti, mobil telefon konsernləri daxildir. Lakin Bakının bulanıq kommersiya dünyası bu iddialrı yoxlamağa imkan vermir və hətta belə iddialar da var ki, Azərbaycanın Londondakı səfirlyinin binası da onun mülkiyətidir.
26 yaşlı Leyla hazırda Londonda milyarder oğlu olan müğənni əri Emin Ağalarov və iki oğlu ilə birgə “Hayd Park”a baxan penthausda yaşayır.
Özünü sənətsevər və kübar kimi göstərən Leylanın ünsiyyət çevrəsinə Elizabet Murdok, Lord Mandelson və şahzadə Endryu kimi qüdrətli insanlar daxildir.
Londona sel kimi axan neft pulları
Leyla bir dəfə beş-on rəfiqəsi üçün keçirdiyi şam yeməyində təkcə əla sampan şərabına 300 min funt sterlinq xərcləyib.
Onun Londona gəlişi Britaniyanın əmlak və iş dünyasına Azərbaycanın neft pullarını sel kimi axıtdı. Leyla və rəfiqələri “Naytsbridc”dəki Azərbaycan restoranında kürü, qutab, nar və qızılgül suflesi, bir şüşəsi 4400 funt sterlinq olan 1999-cu il “Cristal” şərabları seçə bilər.
Keçmiş “Gordon Ramsay’s La Noisette” restoranlar şəbəkəsi Azərbaycanlı dövlət məmuru Kəmaləddin Heydərovun Londondakı milyarder oğlanları – 27 yaşlı Taleh və 26 yaşlı Nicat tərəfindən özəlləşdirilib. Taleh Qəbələdəki yerli futbol komandasına milyonlar xərclədikdən və ingilis məşqçi Tony Adamsla illik 1 million funt sterlinq müqavilə bağlamağa müvəffəq olandan sonra “Azərbaycanın Abrahamoviçi” adlandırılıb.
Leyla isə Əliyevlər ailəsinin yaxşı pul xərcələməyi sevən yeganə üzvü deyil. 2010-cu ildə Dubayda 11 yaşlı azərbaycanlı oğlanın 20 milyon funt sterlinq dəyərində 9 villaya sahib olduğu haqda xəbər yayıldı. Bu məbləğdə vəsaiti qazanmaq üçün isə orta statistik azərbaycanlıya 10 min il lazımdır. Oğlan kimdir? Dubay Torpaq Departamentinin məlumatına əsasən, Heydər Əliyəv – prezidentin oğlu.
Britaniyadan Bakıya müftə səfərlər
İş təkcə varlı azərbaycanlıların Britaniyaya məftunluğu ilə bitmir. Britaniya biznesmenləri də neftlə zəngin Bakıya vurğundurlar. Azərbaycan Dövlət Neft Şirkəti, Tale Heydərovun Londonda yerləşən Avropa-Azərbaycan Cəmiyəti Britaniya siyasətçilərinin Bakıya səfərlərini təşkil edir.
Keçmiş müdafiə naziri Liam Fox, Lord Fraser, Lord Şeix, Bob Blakman, Mark Field, nəqliyyat naziri Stefen Hammond və hətta Olster Yunionistlərinin lordu Kilkluney üçün Bakıya müftə səfərlər təşkil edilib.
Lakin Bakıya səfərlərinin sayına və intensivliyinə görə York hersoquna kimsə çata bilməz.
Dünya Şəffaflıq İndeksinə görə adı korrupsiya siyahısında olan prezident Azərbaycanda şəhzadə Endryunu “əziz qonağımız” deyə təqdim etmişdi. Lakin Britaniyada o, Əliyevlə davam etməkdə olan dostluğuna görə ağır şəkildə tənqid olunur.
Azərbaycan prezidenti ilə şahzadə Endryunu həm də “şit zarafatlara” olan həvəs birləşdirir.
Həbsxanadakı aktivistlər və sürücü Malik
Azərbaycan hakimiyyətinin jurnalistlərə, insan haqları fəallarına qəddar münasibəti isə zarafat məsələ deyil. Bakı həbsxanalarında bir çox reportyor və aktivistlər var. Onların “cinayəti” jurnalist, blogger və aktivist olmalarıdır. Reportyor kimi küçələrdə gəzmək təhlükəli fəaliyyətdir.
Bəs hava limanından Bakıya doğru olan yolda 4 metr hündürlüklü beton divarlar nədir belə? Qara London taksisi artıq bənövşəyiyə boyanmış sürücü Malik izah edir ki, bu, gələn qonaqların yoxsul əraziləri görməsini ənglləmək üçündür…
Əliyev tirandır, amma Britaniyapərəst tirandır
Azərbaycana səfər etmiş Britaniya rəsmilərindən heç biri rəsmi Bakını tənqid etməyib. Yəqin ki, onlar haqlıdırlar. Məsələ burasındadır ki, Əliyev tiran olsa da, Britaniyapərəst tirandır.
Bu ölkədə Avropanın gələcək nəsillərinin enerji təhlükəsizliyi yatır və Əliyev inandırmağa çalışır ki, onun hələ yüz illik qaz ehiyatı var. Həm də bu təchizatın marşrutu “rus ayısı Gazprom” və təməlçi despotizmə malik Səudiyyə və İran üçün əlçatmazdır.
Özünün bütün absurdluğuna baxmayaraq, Azərbaycan Qərbsimalı müsəlman ölkəsidir. Buradan 200 kilometr cənuba gedin və qarşınıza İranın nüvə ambisiyalı teokratiyası çaxacaq…
Çin, ərəb və Amerika pulları Xəzər adalarına xərclənir. Yeni Venesiya kimi təsvir olunan Bakının dənizdəki 41 süni adasının 50 xəstəxanası, 150 məktəbi, gözəl parkları, istirahət güşələri, ticarət mərkəzləri, üniversitet korpusları və Formula-1 yarış yolu ilə gələcəkdə dünyanın ən çox arzu olunan yaşayış mərkəzlərindən biri olacağı gözlənilir.
Dəniz sahilində tikilmiş 33 mərtəbəli aypara şəkilli “Crescent” oteli də tezliklə açılacaq. Bundan sonra “Ulduz müharibələri” filmindəki Ölüm Ulduizunu xatırladan “Full Moon” mehmanxanası da istifadəyə veriləcək. Bakının “Ağ Şəhər”ini tikən və lord Norman Foster kimi memarları olan Atkins UK şirkəti bildirib ki, söhbət Monakodan böyük və Qafqazın ən böyük layihəsindən gedir.
Qərblilərə qarşı viza qaydaları hələ də sərtdir, yalnız neft və ya qaz ekspertlərinin təşkil etdiyi bahalı turlar xaricində. Jurnalistlərin gəlişi də arzu olunmazdır.
Əliyevə qarşı bütün istehza və tənqidlərə baxmayaraq, Qərb liderləri gizlində də olsa, neft və qaz perspektivi baxımından sabitlik gətirmiş şəxsə minnətdardırlar.
Bəşər Əsəd, Əliyevlər və tərsinə dönən çərxi-fələk
Amma real siyasətin öz təhlükələri də var. Regiondakı keçmiş səfirlərdən biri Bəşər Əsədin Suriyada hakimiyyətə gəldiyi dövrü xatırladır. Onda Britaniyanın leyboristlərdən olan xarici işlər naziri bunu “yaxşı xəbər” adlandırmışdı. O demişdi ki, bu çox istiqanlı, müasir baxışlara malik şəxs Suriyanı irəliyə doğru aparacaq. Bu sözləri deyən nazirin adı Peter Hain idi.
Ancaq eybi yoxdur, sonradan başa düşülən şeylər bizi daha da ağıllı edir. Demək istədiyim budur ki, sabit Əliyevlər sülaləsinə və onun göydələnlərinə çox da bel bağlamayın. Bir gün çərxi-fələk tərsinə dönə bilər.
