Əli Ömərov: «Mən olsaydım cinayəti açardım»
Mehman Əliyev: «Cinayətkarların tapılmasında hakimiyyət maraqlı deyil»
Yazıçı-publisist Rafiq Tağının ölümündən 1 il ötür. O, 2011-ci noyabrın 19-u axşam saatlarında işdən evə dönərkən naməlum şəxsin hücumuna məruz qalıb. Çoxsaylı bıçaq xəsarətləri alan yazıçı noyabrın 23-də xəstəxanada keçinib.
Rafiq Tağı həm Iran rejimi, həm də Azərbaycan hakimiyyəti əleyhinə tənqidi yazılarla tanınırdı.
Hadisə ilə bağlı əvvəl Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə cinayət işi başlanıb, lakin Rafiq Tağının ölümündən dərhal sonra Cinayət Məcəlləsinin 120.1-ci (qəsdən adam öldürmə) maddəsinə tövsif olunub. Ictimai rezonans doğuran bu hadisə ilə əlaqədar cinayət təqibi üzrə görülən işlər Azərbaycan prezidentinin xüsusi nəzarətindədir.
Media Hüququ Institutu (MHI) dünən yaydığı bəyanatda Rafiq Tağının qatillərinin ən qısa zamanda tapılmasını təmin edən addımlar atmağa çağırır. MHI eyni zamanda qətli araşdıran hüquq-mühafizə qurumlarını istintaqın məxfiliyinə xələl gətirməyən bilgiləri ictimaiyyətlə bölüşməyə, hesabat verməyə dəvət edib.
Yazıçının ölümündən bir il keçsə də, hələlik qətlin üstü açılmayıb. Halbuki cinayət baş verən ərazidə bir neçə təhlükəsizlik kamerası olub. Bəs R.Tağı ilə bağlı cinayətin üstünün açılmamasının səbəbi nədir?
Keçmiş baş prokuror Əli Ömərəov bildirdi ki, R.Tağının cinayətinin üstünün açılmamasının səbəblərinə hazırda aydınlıq gətirmək onun üçün çətindir. Amma bununla belə Ə.Ömərov hesab edir ki, R.Tağının işi açılmırsa, bunun səbəbləri açıqlanmalıdır: “Mən baş prokuror olsaydım, qoymazdım bu iş bağlı qalsın. Ya həmin işin üstünü açardım, ya da bu baş vermirsə, bunun səbəblərinə aydınlıq gətirərdim”.
“Turan” Informasiya Agentliyinin direktoru Mehman Əliyev isə bildirdi ki, R.Tağının işinin açılmaması siyasi rejimlə bağlıdır. Çünki hakimiyyət cinayətkarların tapılmasında maraqlı deyil: “Ümumilikdə Azərbaycanda hakimiyyət söz azadlığına qarşı mübarizə aparır və mətbuat azdlığının daşıyıcılarını düşmən kimi görür. Onlara qarşı törədilən istər fiziki, istərsə də mənəvi cinayətlər araşdırılmır. Biz hələ görməmişik ki, jurnalistin döyülməsinə, qorxudulmasına görə hər hansı şəxs cəza alsın. Hələlik hakimiyyətin mövqeyi bundan ibarətdir ki, jurnalistlərə qarşı işlər açılmasın”.
Hikmət
