Xalq Cəbhəsi 2013-cü il seçkisini necə görür?
Hakimiyyətin nəzarətindəki mətbuatda son günlər müxalifətin əsas güc mərkəzinin – Ictimai Palatanın növbəti ildə gözlənilən prezident seçkisi ilə bağlı gərgin anlar yaşadığının “sübutüna” çalışılan məqalələr dərc olunur.
Ictimai Palatanın iki əsas donorundan birinin – Müsavat başqanının da növbəti ildə namizəd olacağını qəti formada açıqlaması “müxalifətin vahid namizədi” və bu qəbildən olan mövzularda yeni-yeni spekuliyasiyalara yol açdı. Sosial şəbəkələrdə də IP-in prezident seçkisi öncəsi hansı mövqeyi tutacağı geniş müzakirə olunur. Bu müzakirələrdə AXCP-yə yönələn suallar da xüsusi ağırlıq kəsb edir. Artıq bəziləri AXCP adından “qərar” da qəbul edərək partiyanın 2013-cü il seçkilərini baykot edəcəyini bildirib.
Bəs real mənzərə necədir? AXCP-nin seçkiyə münasibəti nədən ibarətdir və bu münasibət doğrudanmı Ictimai Palatanın dağıdılmasına səbəbdir?
Əvvəlcə işin rəsmi yönünü götürək; bu çağadək AXCP-nin hər hansı strukturunda seçkilərin boykot olunması ilə bağlı heç bir qərar qəbul edilməyib.
AXCP-nin hər hansı bir funksionerinin, sədrinin dilindən 2013 seçkilərini boykot etmək barədə rəy eşidilməyib.
Bəs 2013-cü il seçkisini AXCP necə qarşılayır?
AXCP prezident seçkisinə olduqca səbatlı və birmənalı münasibəti ilə seçilən partiyalardandır. AXCP prezident seçkisinə dumanlı ideya və yanaşmalarla, illüziyaya qapılaraq girmək niyyətində deyil. Partiya sədri Əli Kərimli “Azadlıq” qəzetinə müsahibəsində (04 iyul 2012-ci il) seçkiyə aydın münasibətini ifadə edib. O bildirmişdi ki, bu günün vəzifəsi ölkədə azad, ədalətli, demokratik seçkilərə zəmin yaratmaq uğrunda mübarizə olmalıdır: “Bu günün vəzifəsi azad, ədalətli seçkilər uğrunda müxalifətin daha geniş birliyini təmin etmək olmalıdır. Yalnız demokratik seçki şəraitinə az-çox nail olandan sonra biz bu mövzuda müzakirələr aparmalıyıq”.
Göründüyü kimi, AXCP üçün seçkidən daha önəmli normal seçki şəraitinin olmasıdır. Bu istiqamətdə fəaliyyət həyati fakt kimi önə çəkilir. Bunun üçündür ki, elə həmin müsahibədə Əli Kərimli tərəddüdsüz deyir: “Ictimai Palata daxilində vahid namizədin müəyyənləşdirilməsi ilə bağlı təkliflər vaxtında irəli sürülməyən təkliflərdir. Hazırda biz bu məsələ ilə məşğul olmalı deyilik və bunu ziyanlı hesab edirəm. Müşahidəmə görə, Ictimai Palata daxilində əksəriyyətin mövqeyi mənimlə həmrəydir. Amma buna baxmayaraq, müəyyən səylər oldu ki, Ictimai Palata vaxtından əvvəl bu mövzunu müzakirəyə başlasın. Xeyli təşəbbüslər oldu. Amma Ictimai Palatanın fəalları, cəbhəçilər, Müsavatın daxilində məsələ ilə bağlı sağlam mövqe tutan, bütövlükdə Ictimai Palatanın Koordinasiya Şurasında təmsil olunan insanlar öz mövqelərini ifadə etdilər. Bu gün artıq bu müzakirələrə yekun vurmaq olar ki, Ictimai Palatanın tam əksəriyyəti belə qənaətdədir ki, hazırda bu müzakirələr yersizdir, vaxtsızdır, lazımsızdır, ziyanlıdır. Ona görə də, yəqin ki, Ictimai Palata yenidən toparlanaraq azad, ədalətli seçkilər uğrunda öz mübarizəsini davam etdirəcək”.
AXCP sədri Əli Kərimlinin Ictimai Palatanın 8 sentyabrdakı çıxışı da zənnimcə, bu gün də aktuallığını qoruyur; partiya rəhbərliyində təmsil olunan şəxs kimi yaza bilərəm ki, hələ də 8 sentyabrda göstərilən mövqedə hər hansı dəyişiklik yoxdur. Ən əsası, bu dəyişikliyin olmaması ictimai rəyin xeyrinədir, ziyanına yox.
Həmin iclasda Əli Kərimlinin fikirlərinə təkrar qayıdaq: “Biz səmimi olmalıyıq. Bugünkü seçki şərtləri heç birimizə seçilmək, qalib gəlmək şansı tanımır. Ona görə də həmin o real olmayan şanslara görə müxalifət düşərgəsində hər hansı gərginlik yaratmaqdansa, normal şərait yaratmaq üçün bir araya gəlmək lazımdır. Ictimai Palatanın ölkədə demokratik seçki mühitini təmin etmək, demokratik potensialı bir araya gətirmək istiqamətində addımları davam etməlidir. Bizim hamımız üçün birliyin və həmrəyliyin əldə olunmasının bir siyasi platforması ola bilər: Azərbaycan xalqının özünə hörmət edən hissəsi razı olmamalıdır ki, Ilham Əliyev hansısa konstitusiya manipuliyasiyaları ilə üçüncü dəfə namizəd olsun, yenidən hakimiyyəti bir ailə qəsb etsin. Kimlər özündə güc tapıb, doğrudan da Azərbaycanın xilası, Ilham Əliyevin antikonstitusion addımının dayandırılması üçün bir araya gəlcəksə, onların hamısı ilə birgə yola davam etməliyik”.
Qaranlıq bir məqam qaldımı? Qaldısa, təkrar edək: “Real olmayan şanslara görə müxalifət düşərgəsində hər hansı gərginlik yaratmaqdansa, normal şərait yaratmaq üçün bir araya gəlmək lazımdır”. AXCP cəmiyyətin etirazçı kəsiminin əhəmiyyətli hissəsinin fomalaşdırdığı qurumu – Ictimai Palatanı gücləndirməkdə, toparlamaqda maraqlıdır.
AXCP haqlı olaraq düşünür ki, indi namizədliyi bəyan etməkdən daha vacib iş seçki mühitinin formalaşması üçün birgə fəaliyyətdir.
Natiq Güləhmədoğlu
