Hakimiyyətin 2013-də saxta nəticələri qəbul etdirməsi imkanları məhddudur
Fuad Qəhrəmanlı: «Növbəti seçkilərə hakimiyyət təkcə öz xalqı ilə deyil, həm Qərb, həm də Rusiya ilə qarşıdurma vəziyyətində gedir»
Azərbaycan hakimiyyəti 2013-cü il seçkilərinə keçmiş müttəfiqləri olan Rusiya və Iranla münasibətləri gərgin formada getməkdədir. Belə ki, bir qayda olaraq seçki saxtakarlığına qarşı beynəlxalq təzyiqlərə qarşı Rusiyanın dəstəyini arxasına alan hakimiyyət növbəti seçkidə bu köməkdən məhrumdur. Hakimiyyətin hazırda Avropa Birliyi və Avropa Şurası ilə münasibətləri də yaxşı deyil. Bu mövtəbər qurumlar hakimiyyətdən demokratik islahatlar tələb etdiyini dəfələrlə vurğulayıblar.
ABŞ-ın Azərbaycana qarşı mövqeyinin nədən ibarət olduğunu isə bu günlərdə “Turan”a açıqlamasında ABŞ-ın Karlton Universitetinin Avropa və Avrasiya Araşdırmaları Institutunun direktoru Cef Saxadeo dilə gətirib. O bildirib ki, Amerika Azərbaycanı avtoritar və irsi rejimli ölkə kimi tanıyır. Onun sözlərinə görə, hüquq müdafiə təşkilatlarına qarşı hücumları normal hesab edənlər Konqresdə dost tapa bilməzlər. O hesab edir ki, Azərbaycan hökuməti Qərblə münasibətlərini inkişaf etdirmək üçün ölkədə plüralizmin təmin edilməsi üzrə konkret addımlar atmalıdır.
AXCP sədrinin müavini Fuad Qəhrəmanlının fikrincə, hazırda Azərbaycanın xarici siyasətində böhran müşahidə olunmaqdadır. Uzun illər ərzində hakimiyyətin həyata keçirdiyi balanslı siyasət konsepsiyasının “Ərəb baharı”nın gəlişi ilə iflasa uğradığının görünməkdə olduğunu deyən F.Qəhrəmanlı vurğuladı ki, bunun da əsasında həm Qərb, həm də Rusiya ilə konsensusun aradan qalxması durur: “Bu, enerji, təhlükəsizlik və siyasi sahədə özünü göstərməkdədir. Artıq birmənalı şəkildə demək olar ki, bu balanslı siyasət Azərbaycan hökumətinin məharətinin nəticəsi deyildi və daha çox kənar güclərin öz aralarındakı razılaşmanın nəticəsi idi. Bu razılaşma aradan qalxan kimi məhz balanslı siyasət də iflasa uğradı. Deməli, hakimiyyətin balanslı siyasət kimi təqdim etdiyi məsələ onun iradəsindən asılı olmayan bir xətt imiş. Bu gün artıq münasibətlərdə fərqli qütblərlə açıq qarşıdurma meyilləri ifadə olunur. Qərblə açıq müşahidə olunan gərginlik yaşanmaqdadır. Azərbaycan Qərblə münasibətlərin daha çox önəmli olduğunu və ölkəmizə təsir imkanlarını nəzərə alaraq bir çox geopolitik məsələlərdə onun maraqlarına cavab verən addımlar atır. Son olaraq Transxəzər layihəsinin təsdiqlənməsini göstərmək olar ki, bu, olduqca mühüm geostrateji əhəmiyyəti olan bir proyektdir. Bununla da Avropanın alternativ enerji dəhlizi yaratmaq istəklərinə bir növ yaşıl işıq yandırılmış oldu”.
F.Qəhrəmanlının fikrincə, lakin görünən odur ki, bütün bu cəhdlərə baxmayaraq Qərb Azərbaycandakı demokratik dəyişikliklərlə bağlı tələbləri enerji maraqlarına qurban vermək niyyətində deyil. Bütün bu addımlardan sonra eyni sərtlik və ritorika ilə Azərbaycandan demokratik islahatlar tələb olunmaqdadır: “Artıq Azərbaycan hakimiyyətinin yerinə yetirdiyi siyasət elə bir qabarıq formada ifadə olunub ki, Qərb ictimaiyyətində Azərbaycana münasibət Belarus rejiminə yanaşmadan fərqlənmir. Bu da Qərbin rəsmi dairələrinin ictimai rəyi nəzərə alaraq hərəkət etməsinə gətirib çıxarır. Geosiyasi maraqların ifadəsi baxımından atılmış addımlar Azərbaycan hakimiyyətinə münasibəti dəyişmir”.
F.Qəhrəmanlının sözlərinə görə, başqa ciddi bir məqam Qərblə qarşıdurmanın fonunda Azərbaycanın Rusiya ilə əlaqələrinin soyuqlaşmaqda davam etməsidir. AXCP yetkilisi vurğuladı ki, Azərbaycanla Qərb arasında münasibətlərin gərgin olduğunu gördüyündən, eyni zamanda Azərbaycanın Rusiyanın maraqlarına uyğun olmayan geosiyasi güzəştlərinə görə Kreml Azərbaycanı bir növ cəzalandırmağa çalışır: “Rusiya hesab edir ki, hazırda Azərbaycan Kremldən təsirə daha çox açıqdır. Rusiya artıq bu istiqamətdə müəyyən addımlar atır. Bu addımlara son olaraq ”Sadval”ın fəaliyyətinin bərpasını göstərmək olar. Bu təşkilatın yaradılması, Azərbaycanla sərhəddə Rusiya hərbi birləşmələrinin sayının artırılması, Ermənistanda Rusiyanın iştirakı ilə irimiqysalı təlimlərin keçirilməsi Azərbaycana təzyiq xarakteri daşıyır. Güman ki, Rusiya ilə münasibətlər qarşıdakı dönəmdə gərginləşməyə doğru gedəcək. Çünki parlamentdə Transxəzər layihəsi təsdiqləndi və bu, Rusiyanın xüsusi önəm verdiyi məsələlərdən biridir. Eyni zamanda Qəbələ RLS-lə bağlı anlaşılmazlıq var”.
F.Qəhrəmanlının fikrincə, bütün bu müşahidə olunan məqamlar onu deməyə əsas verir ki, 2013-cü il seçkilərinə hakimiyyət təkcə öz xalqı ilə deyil, beynəlxalq birliklə – həm Qərb, həm də Rusiya ilə qarşıdurma vəziyyətində gedir: “Azərbaycan hakimiyyəti islahatlara gedərək Qərbin dəstəyini alaraq, Azərbaycanın Avroatlantik məkana inteqrasiya kursunu deyil, repressiv metodları artıraraq, inzibati güc hesabına daxildə stabillik yaradaraq xarici təzyiqləri neytrallaşdırmağa çalışır. Eyni vaxtda hamı ilə müharibə vəziyyətində olması hakimiyyətin 2013-cü ildə seçki kimi ağır prosesi həyata keçirib, saxta nəticələri qəbul etdirmək imkanlarını xeyli məhdudlaşdırır. Həm Qərb, həm Rusiyadan gələn təzyiqlərin fonunda daxili etirazların artması hakimiyyət üçün acı sonluğun anonsunu verə bilər”.
Xəyal