Prodüser Kənan Bayramov: «Röyanın dindirilməsində şəxsən özüm də iştirak etmişəm»
“Müğənni Röya haqda mətbuatda yayılan xəbərlər doğrudur”. modern.az saytının xəbərinə görə, bu sözləri öz facebook profilində müğənninin prodüseri Tolik yazıb. “Bu xəbəri kim yazıb bilmirəm, amma demək istəyirəm ki, bu xəbərlərin 70 faizi düzdür. Mən bu haqda danışmaq istəmirəm. Amma mən bu işin içində olmuşam, elə bu Əqid adlı şəxsin ucbatından mənim atam ürəyindən əməliyyat olundu. Ona görə də Allah Röyanın bəlasını versin. Inşallah, bir gün bu haqda danışacağam, amma hələ ki susuram. Qurban olsunlar atama” – deyə Tolik məsələyə münasibət bildirib.
“Röyanı Baş Mütəşəkkil Cinayətkarlığa Qarşı Mübarizə Idarəsində dindiriblər. Röya ilə Elton arasında insident olub və artıq onlar barışıblar. Röyanın dindirilməsində şəxsən özüm də iştirak etmişəm”. Bu sözləri isə vesti.az-a müğənni Röya Ayxanın prodüseri Kənan Bayramov deyib. Prodüser R.Ayxanın gözəllik salonundan “Bandotdel”ə aparılması xəbərinin həqiqət olmadığını da söyləyib.
Müğənni Elton isə xaricdə olduğundan insidentə onun münasibətini öyrənmək mümkün olmayıb.
Məlumatlara görə, müğənnilər Röya ilə Elton arasında uzun müddət imiş mahnı üstündə mübahisə yaşanıbmış. Elton Röyanı mübahisə zəminində hədələyib. Bundan sonra hər iki müğənni arasında mübahisə daha da böyüyüb. Röya bununla bağlı uzun müddətdir dostluq etdiyi Səfərbərlik və Hərbi Xidmətə Çağırış üzrə Dövlət Xidməti (SHXÇDX) Mingəçevir şəhər şöbəsinin rəhbəri, general Bəylər Əyyubovun yaxın qohumu Əqid Bayroyevə müraciət edib. Xahiş edib ki, Eltonu cəzalandırsın. Hərbi komissar da eləməyib tənbəllik, Eltonun üstünə silahlı adamlar göndərib. Həmin adamlar müğənnini sillələyəndən sonra onun başına silah dirəyiblər. Ona “bir də Röyaya gözün üstə qaşın var desən, səni öldürərik” tipində hədə-qorxu gəliblər.
Başına gələn bu hadisəni yaxın ətrafına danışandan sonra dostlarından kimsə Eltona başa salıb ki, bununla bağlı hüquq-mühafizə orqanlarına müraciət etsin. Elton da DIN Baş Mütəşəkkil Cinayətkarlıqla Mübarizə Idarəsinin (BMCMI) rəisi Mirqafar Seyidovun adına şikayət ərizəsi yazıb. Bundan sonra əməliyyat hazırlanıb. “Bandotdel”in əməkdaşları Röyanı gözəllik salonunda makiyaj masasının arxasından götürərək idarəyə aparıblar. Elton da BMCMI-yə dəvət olunub. Müstəntiq müğənniləri üzləşdirib və Röya Eltonu Əqid Bayroyev vasitəsilə cəzalandırdığını rəsmən etiraf edib. Bu olay Bəylər Əyyubova çatdırılandan sonra qohumunun işdən qovulmasına etiraz etməyib.
Röya isə bugünlərdə telekanallara müsahibəsində artıq səhnədə olmaq istəmədiyini, Azərbaycandan gedəcəyini bildirib. Deyilənə görə, onun bu sensasion bəyanatı bu hadisə ilə bağlıdır.
