Keçmiş rektor Elşad Abdullayevin saxlancında həm də “polis rəisi, prokuror, MTN əməkdaşına aid” gizli videoçəkilişlərin olması barədə vəkil Adil Ismayılovun açıqlamasına “Azadlıq” qəzeti münasibət bildirib və məlumatlı mənbəyə istinadla polis rəisinin Nazim Nağıyev, prokurorun Mirələkbər Seyidov, MTN işçisinin Əli Nağıyev olması ehtimalı irəli sürülüb.
Məntiqli ehtimaldır: Beynəlxalq Universitet Binəqədi rayonunun ərazisində yerləşirdi və keçmiş rektorun qardaşının oğurlanması faktına görə rayon hüquq-mühafizə orqanları (Binəqədinin polis rəisi N.Nağıyev, prokuroru M.Seyidov olub) ilə görüşməsi qayət normal bir işdir. Nəzərə alsaq ki, rektorun rayon rəhbərliyi ilə əlaqələrində – Azərbaycan reallığına uyğun olaraq – daha çox qarşı tərəf maraqlı görünür, onda bu münasibətlərin hətta yüksək səviyyədə olmasını düşünmək üçün xeyli əsas yaranır.
O ki qaldı Milli Təhlükəsizlik nazirinin keçmiş müavini, hazırda Korrupsiyaya qarşı Mübarizə Idarəsinin rəisi Əli Nağıyevin “gizli videosunun” mümkünlüyü fərziyyəsinə, bu da versiyalardan biri kimi “ağlabatmaz və məntiqsiz” deyil: MTN-nin mayoru Mahir Abdullayev yoxa çıxırsa, rektor qardaşına görə ölkədaxili bir çox məsələlərdə tez-tez adı hallanan MT nazirinin müavini ilə görüşməyib, dərdini mənəmi deməlidir?
Maraqlı məqam isə bu məsələyə hörmətli həmkarımız və hüquq müdafiəçisi Eynulla Fətullayevin çox çevik və kifayət qədər həyəcanlı reaksiyasıdır: əziz dostumuz və qardaşımız Eynulla rəhbərlik etdiyi saytda verdiyi təkziblə kifayətlənmir, digər xəbər portallarına da açıqlamasını göndərməklə “Azadlıq”ın “yalan yazdığını” isbatlamağa çalışır.
Buna da normal yanaşmaq olardı, – Eynulla bəyin əsas gətirdiyi faktın səhihliyi barədə elə ilk baxışdaca görünən şübhələr və onların yaratdığı suallar olmasaydı.
Eynulla bəy deyir ki, “Strasburqda olanda Elşad Abdullayevin əlində olan bütün videolara baxmışam”.
Elşad Abdullayev 2003-cü ildən başlayaraq az qala bütün görüşdüyü adamların görüntüsünü və səsini yazmaqla məşğul olub. Hətta hərdən şübhələnirəm ki, işi-gücü ancaq “yazmaq”dan ibarət olan rektorun öz “ştatdankənar” xanımlarıyla görüşlərini də lentə alması mümkündür. Eynulla bəyin baxdıqlarında nələr var?
Digər tərəfdən, Elşad Abdullayevin “möhtəşəm arxivi”ndə 400-ə yaxın gizli çəkilişin olduğu haqqında özü və ətrafı məlumat verməkdədirlər. Gülər Əhmədova olayından sonra bəlli oldu ki, bu videolar tammetrajlı və qısametrajlı olaraq 2 hissəyə ayrılır: 30 dəqiqədən 5 saata qədər.
Hər videonun həcmini orta hesabla (ən azı!) bir saatdan götürsək, Elşad Abdullayevdə 400 saatlıq arxiv olduğunu qəbul etməliyik. Eynulla bəy 17 gün gecə-gündüz oturub, o videolara baxıbmı?
Hətta o videolara “bir dəqiqəlik göz atmaqla” izləmək belə bir sutkalıq “görüş” və şərait tələb edir. Olsun ki, Eynulla Fətullayev “bütün videolar” deyəndə, ötəri baxmağı nəzərdə tutur.
Aha: görəsən, Elşad Abdullayev Eynulla Fətullayevə hansı inam və etibar sayəsində bu şəraiti yaradıb? Münasibətdə olduğu ən yaxın adamlara belə inanmayan, hamısını videoya çəkən bu “son dərəcə etibarsız adam” – Elşad Abdullayev birdən-birə nə təhər oldu ki, bütün arxivini Eynulla bəyin üzünə açdı?
Növbəti sual: Nazim Nağıyevin müdafiəsini anlamaq olar – Eynulla bəy Əli Nağıyevin (keçmiş nazir və səfir) müşaviri olub və mümkündür ki, Nağıyevlərlə (bu Nağıyevlərin çekist Əli Nağıyevə aidiyyəti yoxdur) normal münasibəti hələ də qalsın. Bəs, çekist, Antikorrupsiya rəhbəri Əli Nağıyevin müdafiəsində məqsəd nədir?
Ümumiyyətlə, Elşad Abdullayevlə “bir neçə dəfə” görüşən Eynulla bəy “hər dəfə” nələrdən söhbət edib və bu “bir neçə dəfə” görüşdə məqsəd nə imiş? Abdullayevə hansısa təkliflərmi aparıbmış? Elşad Abdullayevin arxasında keçmiş baş prokuror, hazırkı səfir Eldar Həsənovun durması barədə Eynulla Fətullayevin dövriyyəyə buraxdığı inflormasiyada məqsəd hansısa emissarlığın növbəti mərhələsi deyildi ki?
Ümid edirəm, həmişə şəffaf yaşayan, hətta qəzetləri bağlanıb, özü həbs olunarkən redaksiyanın 41 ədəd kompüterinin niyə Kəmaləddin Heydərov tərəfindən müsadirə olunmasına və indiyədək FHN-də saxlanmasına aydınlıq gətirməməklə hər şeyi aydınlaşdıran, buna görə də həmkarları arasında xüsusi hörmət qazanan əziz dostumuz Eynulla bəy yarana biləcək hər hansı şübhəli sualları ənənəvi olaraq öz fəaliyyəti ilə cavablandıracaq və daşıdığı “hüquq müdafiəçisi” adının birinci komponentinin yerinə tez-tez vəzifə sahiblərinin adının yazılması ilə stimullaşan iş pirsipinin imicinə çevrildiyinin qayğısına qalacaq…
Elşad Abdullayevdəki bütün videolara Eynulla bəy necə baxa bilib?
•
