AXCP Saatlı və Sabirabad şöbələri ziyalılara yönəlik siyasəti pisləyir
AXCP Saatlı və Sabirabad şöbələri ölkədə baş verən son proseslərlə bağlı birgə bəyanat yayıb. Bəyanatda deyilir:
“Azərbaycanda prezident seçkiləri yaxınlaşdıqca siyasi gərginlik daha da artır. Bu gərginlik hakimiyyət düşərgəsində daha çox nəzərə çarpmaqdadır. Hakimiyyətdaxili çəkişmənin artıq açıq müstəviyə keçdiyi görünür. Xaricdən heç bir dəstək ala bilməyən və xalqın da durumunun artıq dözülməz həddə çatdığını hiss edən hakimiyyət həm müxalifətə, həm də siyasətini bəyənmədiyini dilə gətirən hər kəsə qarşı açıq hücuma start verib.
Bu gülünc siyasət hakimiyyətyönlü KIV-lərdə və TV-lərdə özünü açıq büruzə verir. Sərbəst toplaşmaq azadlığı kimi öz konstitusion hüquqlarından istifadə edənlərə qarşı cərimələrin artırılması, Avropa, ABŞ və Avropa ölkələrinə qarşı aparılan “qara piar” kampaniyası buna bariz nümunədir.
Hakimiyyət hətta mütərəqqi ziyalılara qarşı da hücuma keçir. Ziyalılar Forumunun nümayəndələrinə, o cümlədən Rüstəm Ibrahimbəyova qarşı aparılan gözdənsalma təbliğatı bu baxımdan hakimiyyəti daha gülünc vəziyyətə salır. Saysız mükafatlara layiq görülmüş, dünya şöhrətli ziyalıya hətta “Rüstəm Ibrahimbəyov ziyalı deyil” deməkdən də utanmırlar.
AXCP Saatlı və Sabirabad şöbələri bəyan edir ki, qumarbazı, korrupsioneri, rüşvətxoru ziyalı sayan bir hakimiyyətin gözünə Rüstəm Ibrahimbəyov və onun kimi ziyalılar ziyalı kimi görünə bilməz.
Rayon şöbələri hakimiyyətdən apardığı siyasətdən geri çəkilməyi, siyasi məhbusları dərhal azad etməyi, sərbəst toplaşmaq azadlığını bərpa etməyi və azad seçki mühiti yaratmağı, Rüstəm Ibrahimbəyov kimi ziyalılara qarşı çirkin təbliğatı dayandırmağı tələb edir”.
Informasiya şöbəsi
