Bu gecə Bakının Suraxanı rayonu ərazisində bir qrup vətəndaşla polislər arasında dava olub. Dava zamanı 5 polis işçisi yaralanıb.
Bu barədə hüquq-mühafizə orqanlarından “Lent.az”a məlumat verilib. Məlumatda bildirilir ki, davaya səbəb vətəndaşların polis əməkdaşlarına itaətsizlik göstərməsi olub. “Saat 03.00 radələrində Qaraçuxur qəsəbəsində, ailəvi istirahət mərkəzinin yaxınlığında 5-6 nəfər xidmət aparan polis əməkdaşlarının qanuni tələbinə tabe olmayıb və asayişi kobud şəkildə pozub. Bu zaman həmin şəxslər polis əməkdaşlarına hücum ediblər və bir neçə polis əməkdaşına xəsarət yetirilib. Əraziyə dərhal əlavə qüvvə göndərilib, lakin asayişi pozan şəxslər tabeçilik göstərməyiblər və dava-dalaş daha da böyüyüb.
Hadisə nəticəsində aralarında polis kapitanı və leytenantı da olmaqla 5 polis işçisi müxtəlif dərəcəli bədən xəsarəti alıb. Asayişi pozan şəxslər saxlanılıb. Faktla bağlı rayon prokurorluğunda araşdırma aparılır.
Yaralananların hamısı Suraxanı RPİ 32-ci Polis Bölməsinin əməkdaşıdır”, – deyə məlumatda bildirilir.
