Onların ya Kremlin, ya da Bakının planlarında yer aldığı ehtimal olunur
Bir neçə gün əvvəl Bakıda 1990-1995-ci illər Azərbaycan parlamentində təmsil olunmuş şəxslərin toplantasının keçirilməsi barədə məlumat yayıldı. Həmin məlumatda deyilirdi ki, keçmiş deputatların toplantısı ölkənin bütün regionlarını əhatə edib. “Toplantı iştirakçıları ölkənin cari problemlərini müzakirə edirlər, mühüm və tənqidi məqamlarla bağlı öz fikirlərini söyləməyi, onlara ictimaiyyətin, hökumət dairələrinin diqqətini cəlb etməyi vacib sayırlar”.
Bu dəfə keçmiş deputatlar respublikadakı sosial-iqtisadi durumu müzakirə ediblər. Həmçinin keçmiş deputatların toplantısı qərara alıb ki, bu sosial ədalətsizliyin aradan qaldırılması çağırışı ilə dövlət başçısına müraciət qəbul olunsun.
Apardığımız araşdırmalar zamanı bəlli olub ki, o zamanın fəal istiqlalçı deputatlarından toplantıya heç kim dəvət olunmayıb. Istiqlalçı deputatlardan bir neçəsi bizimlə söhbətlərində bildiriblər ki, onlar ümumiyyətlə sözügedən toplantıdan xəbərdar deyillər. Eyni zamanda aydın olub ki, toplantı keçirən deputatlar fəaliyyətləri dövründə o qədər də fəal olmayıblar. Hər hansı bir addımları ilə yadda qalmayıblar. Bəs indi nə baş verib ki, bu şəxslər fəallaşıb?
Adının çəkilməsini istəməyən istiqlalçı deputatlardan biri bu hadisəni təsadüfi saymır. Onun fikrincə, bu məsələ ilə bağlı iki versiya irəli sürmək olar. Versiyalardan biri budur ki, Rusiyanın Azərbaycanın qarşı fəallaşdığı bir vaxtda həmin deputatların toplaşması Kremlin ölkəmizlə bağlı planlarının tərkib hissəsi ola bilər. Ikinci versiyaya görə bu Azərbaycan hakimiyyətinin öz planıdır. Hakimiyyət bu şəxslərin sabiq prezident Ayaz Mütəllibova yaxın olmasından istifadə edərək onun ətrafında bir qrup formalaşdırır. Bu Ayaz Mütəllibovun iqtidarın gələcək planlarında yer alması üçün lazım ola bilər. Lakin indidən bunu biruzə verməmək üçün həmin şəxslərə hakimiyyətə yönəlik çıxışlar etmək icazəsi verilib.
