Arzu Daşdəmirov Mahir Abdullayevin işi ilə bağlı istintaqın suallarına cavab verib
DİN zabiti: “Məni bu işlərə qatmayın”
Fəaliyyəti dayandırılan Azərbaycan Beynəxalq Universitetinin rektoru Elşad Abdullayevin qardaşı Mahir Abdullayevin işi ilə bağlı Baş Prokurorluqda yeni yaradılan istintaq qrupu bu işdə adı çəkilən şəxslərin dindirilməsini davam etdirir. Moderator.az-ın əldə etdiyi məlumatda bildirilir ki, Elşad Abdullayevin qardaşının işi ilə bağlı adını çəkdiyi Daxili İşlər Nazirliyinin Baş İdarəsinin rəisi müavini, polis polkovniki Arzu Daşdəmirov da prokurorluğa çağrılıb. Məlumata görə, Arzu Daşdəmirov istintaqın iş adamı Arzu Kazımovla və Elşad Abdullayevlə Mahir Abdullayevin axtarışı barədə söhbətlərinə dair suallarına cavab verib.
Onun istintaq prosesində hazırda həbsdə olan Arzu Kazımovla üzləşdirildiyi də bildirilir.
Moderator.az-ın əməkdaşının əlaqə saxladığı DİN polkovnikinin özü isə bu barədə danışmaq istəmədiyini deyib: “Mən artıq dərəcədə xahiş edirəm, bu işə məni qatmayın. Mən Elşad Abdullayevi tanımıram və onu görməmişəm”.
