Firma köşkünə sahib çıxmaq əvəzinə, əməkdaşından işdən çıxmağı tələb edir
“Qasid” Yayım Firmasına məxsus daha bir köşk götürülüb. Köşk Bakının Səməd Vurğun küçəsi ilə Həzi Aslanov küçəsinin kəsişməsində yerləşirdi. Köşkün sahibi Kamran Hüseynovun sözlərinə görə, noyabrın 8-də Bakı Şəhər İcra Hakimiyyətindən nümayəndələr gələrək prezidentin yaxınlıqdakı 1 saylı məktəbin açılışına gələcəyini, bu səbəbdən köşkün götürülməli olduğunu bildiriblər. Lakin onu da deyiblər ki, köhnə köşkü yenisi ilə əvəzləyəcəklər: “Prezident açılışa gəldi. Mənə dedilər ki, köşkdəki malların yarısını boşalt. Mən də malların bir qismini evə aparıb geri qayıdanda gördüm ki, köşkü yerli-dibli götürüblər. İçərisində də 3 min manatdan artıq mal var idi. Bir sutkalıq axtarışdan sonra tapmışam ki, hara aparıblar. Dünən də “Qasid”dən zəng ediblər ki, gəl, könüllü işdən çıxmaq istədiyinlə bağlı ərizə yaz”.
Himayəsində üç azyaşlı uşaq və yaşlı anasının olduğunu deyən K.Hüseynov olduqca çətin vəziyyətə düşdüyünü və bundan sonra necə dolanacağını bilmədiyini dedi.
Gültəkin
