Millət vəkili Qənirə Paşayeva 2013-cü il büdcə layihəsi ilə bağlı Milli Məclisdə keçirilən müzakirələrdə tibb və təhsil işçilərinin əməkhaqqının artırılmasını vurğulayıb, sonra da Nazirlər Kabinetini prezidentin sərəncamına əməl etməməkdə suçlayıb. Demə, möhtərəmimiz tibb və təhsil işçilərinin “dövlət qulluqçusu” olması üçün ötən il aprelin 20-də sərəncam veribmiş, 3 ay müddətində konsepsiya layihəsi hazırlanmalıymış, amma Nazirlər Kabineti aradan il yarım ötməsinə baxmayaraq, bu işi görməyib. Qənirə xanım da prezidentin sərəncamını vecinə almayan nazirlərin kabinetinə irad tutub.
Guya, hansı fövqəladə hadisə baş verib ki! Məmurlar möhtərəmin xalqın mənafeyinə uyğun deyilən hansı sözünə, sərəncamına əməl edirlər ki, sonuncunun davası da aparılır?
Birinci, tibb və səhiyyə işçilərini dövlət qulluqçusu etmək üçün verilən sərəncamdan 3 ay əvvəl prezident “antikorrupsiyanın gücləndirilməsi”nə göstəriş vermişdi. Bəlli oldu ki, 2004-cü ildən qollarını çırmayaraq, bir-birinin ardınca idarələr yaradan, qanunlar təsdiqləyən, dövlət proqramları qəbul edən hakimiyyətin antikorrupsiya siyasəti sıfırdır və hörmətli Ramiz Mehdiyev şəxsən Ilham Əliyevə əsaslanaraq, bundan sonra korrupsiyanın kökünü kəsməkdə maraqlı olduqlarını dilə gətirdi. Iş o yerə çatdı ki, Zakir Qaralov “korrupsiyanın əlamətlərini” sadalamağa girişdi. Nəticəsi varmı?
Indi hamı əvvəlkindən daha betər, daha eybəcər, daha biabırçı şəkildə rüşvət almaqla məşğuldur.
Ikinci, 2011-ci il martın 9-da paytaxt meriyasında müşavirə keçirən möhtərəmimiz Bakı və Bakıətrafı rayonlarda 500 minə qədər sənədsiz evin olduğunu və “qısa müddətdə” sənədləşmə aparılması üçün layihənin işlənib hazırlanmasını tapşırdı. Ancaq prezidentin ağzından çıxan söz qulaqlara çatmamış, yəni cəmi bir ay sonra ARDNŞ “sənədsiz evlərin” söküntüsünə girişdi; həm də necə: evin altında qalan kim, başı dağılan kim, gözü yaşlı yurdundan dışarı atılan kim? Və bu “kimlərin” sayı təxminən 20 minə çatdırıldı.
Aradan bir il 8 ay ötəndən sonra mənzərə necədir? Hansısa “sənədsiz” evin sənədləşməsi prosesini kimsə müşahidə edibmi? Layihənin Milli Məclisdə bir-iki dəfə müzakirəsindən və “sənədsiz evlərin” insanların başına uçurulmasından başqa, hansı əməli iş var ortada?
Üçüncü, 2009-cu ildə prezidentin imzası ilə Mənzil Məcəlləsi qüvvəyə minib. Qanunvericiliyə uyğun olaraq, ən geci 3 ay müddətində Nazirlər Kabineti yeni Mənzil Məcəlləsinin Əsasnaməsini təsdiqləməlidir ki, qanun praktikada tətbiq edilsin. Amma Nazirlər Kabineti 3 ildən artıqdır ki, Mənzil Məcəlləsinin Əsasnaməsini hazırlamır. Vəziyyət isə belədir: köhnə məcəllə qüvvədən düşüb, yenisinin Əsasnaməsi olmadığından, praktik əhəmiyyəti yoxdur və bu sahədə tam bir başıpozuqluq 3 ildir ki, davam edir.
Dördüncü, möhtərəmimiz inhisarlaşmaya qarşı mübarizəyə başladığını ötən ilin Novruz bayramı ərəfəsində “xüsusi olaraq” bəyan eləmişdi. Məşhur “Yumurta müşavirəsi” kimi tarixə keçən iclasda bəzi məhsulların, ələlxüsus yumurtanın qalxan qiymətinin anasını ağlar qoymuşdu.
Aradan qısa müddət keçdi və yumurta – möhtərəmin dediyi kimi, “bu ümdə və çox lazımlı ərzaq” – yenidən bahalaşmağa başladı.
Siyahını nə qədər istəsən, uzatmaq mümkündür. Belə qənaət hasil olur ki, möhtərəm prezidentimizin verdiyi sərəncamları, tapşırıq və göstərişlərini mənasız kağız parçası, məzmunsuz və heç bir dəyəri olmayan “vızıltı” hesab edirlər.
Bu ölkədə Ilham Əliyevin hansısa layihənin yarımçıq qalmış tikintisinə, yol, korpü quruculuğuna, binaların üzünün qaşınmasına yönəldilən fantastik ayırmalarla bağlı sərəncamları, tapşırıqları dərhal icra edilir, ölkənin və vətəndaşın marağına uyğun qanunlar, qərarlar və göstərişlərin icrası üçünsə kimsə narahat olmur.
Əslində, Ilham Əliyev də “evlərin sənədləşməsi”, “əsasnamələrin hazırlanması” qayğısına qalmır; qalsaydı, bir çörək sexinin açılışını etməyə fürsət tapan prezident verdiyi sərəncamların icrasını nəzarət altda saxlayar və Nazirlər Kabinetinin, məmurlarının hesabat verməsini tələb edərdi.
Deməli, hər şey əvvəlcədən hazırlanmış ssenari əsasında gedir: xalq üzünə deyilən sözlər ayrı, komandanın içində yürüdülən siyasət isə ayrı…
İlham Əliyevin hansı sərəncamları yerinə yetirilir ki!
•
