“Özünü ziyalı kimi təqdim etməyə çalışan o…”
Azərbaycan Respublikası Dövlət Neft Şirkəti (ARDNŞ) tanınmış kinodramaturq Rüstəm İbrahimbəyovu ittiham edən açıqlama yayıb. Açıqlamada iddia ounur ki, İbrahimbəyovun mətbauta müsahibələrində “qurumun nüfuzuna xələl gətirmək məqsədi daşıyan” fikirlər səslənib. Və guya açıqlama da buna görə verilib. Açıqlamada deyilir:
“Son vaxtlar Rüstəm İbrahimbəyovun bir sıra mətbuat orqanlarına verdiyi müsahibələrdə ARDNŞ-nin nüfuzuna xələl gətirmək məqsədi daşıyan əsassız iddialar irəli sürülür. Bu müsahibələrdən açıq-aşkar görünür ki, R.İbrahimbəyovun narazılığı onunla əlaqədar olan bir neçə torpaq mübahisəsi ilə birbaşa bağlıdır…
R.İbrahimbəyov müsahibələrində iddia edir ki, “əldə etdiyi” torpaq sahələri guya “kino sahəsinin inkişafına yönəlmiş böyük bir layihə üçün” nəzərdə tutulmuşdur. Lakin məhkəmə araşdırmaları nəticəsində müəyyən edilmişdir ki, həmin torpaq sahələri müxtəlif şəxslərin, daha dəqiq desək, onun həyat yoldaşı İbrahimbəyova Şöhrət Salman qızının, yaxın qohumları Əfəndiyeva Lalə Kamil qızı, Əfəndiyev Erkin Orxan oğlu, Quliyeva Vahidə Həmid qızı, Hüseynov Şükür Hüseynəli oğlu, Həsənova Ülviyyə Atamalı qızı, Həsənova Ülkər Atamalı qızı, Həsənova Pərvanə Qurbanqulu qızı, Quliyev Vaqif Fərruxoviç, Həsənov Atamalı Ehtiram oğlu, Quliyev Cəmal Vaqif oğlunun, eləcə də yaxınları olan İmanova Nailə Davud qızı və Səfərov Faiq Firuz oğlunun adına fərdi yaşayış evlərinin tikilməsi üçün heç bir hüquqi əsası olmayan bələdiyyə qərarları ilə ayrılmışdır…
Bu hallar həm rayon məhkəmələrində, həm appelyasiya, həm də ali məhkəmədə hər bir iş üzrə ətraflı araşdırmanın predmeti olmuş və torpaqlar üzərində ARDNŞ-nin hüquqları öz təsdiqini tapmışdır. Göründüyü kimi, guya kino sahəsinin inkişafına aid edilən bu layihə üçün rəsmiləşdirilmiş torpaq sahələri, əslində, ayrı-ayrı adamların şəxsi məqsəd və maraqları üçün nəzərdə tutulmuşdur. R.İbrahimbəyov həmin torpaq sahələrinin faktiki olaraq ona məxsus olduğunu etiraf etməklə əslində, bu ərazilərin qeyri-qanuni əsaslarla əldə olunduğunu bir daha təsdiqləyir. Bununla kifayətlənməyən R.İbrahimbəyov özünə xüsusi yanaşma tələb edir və məqsədlərinə nail olmaq üçün “kino sahəsinin inkişafına yönəlmiş böyük layihə”ni bəhanə gətirir. Halbuki özünü ziyalı kimi təqdim etməyə çalışan o, ilk növbədə qanunlara hörmətlə yanaşmalı və özünü cəmiyyətdən fərqləndirməməli idi”.
