Noybarın 14-də Milli Məclis 2013-cü ilin dövlət büdcəsi layihəsinin müzakirəsini davam etdirir. “Media forum” saytının məlumatına görə, müzakirələrdə danışan deputat Vahid Əhmədov deyib ki, müəllimlərin, həkimlərin, büdcə təşkilatlarında çalışan 700 minə qədər şəxsin maaşının artırılması, həmçinin sovet dönəmindən qalan əmanətlərin qaytarılması üçün 500 milyon manat vəsait ayrılması müsbət haldır: “Ancaq kənd təsərrüfatı sahəsinə ayrılan 27 milyon manat çox azdır. Bu sahənin inkişaf etdirilməsi, islahatlar aparılması üçün vəsait artırılmalıdır”.
Deputat ölkədə 45 bank olduğunu xatırladaraq deyib: “Bu qədər banka ehtiyac varmı? Hər oliqarxın öz bankı var. Bank faizləri isə yüksəkdir. Rayonlarda banklardan pul götürüb qaytara bilməyən insanların evlərini, torpaqlarını, mülklərini əlindən alırlar. Çünki bank faizləri 25-30 faiz arasındadır, insanlar bu pulu qaytara bilmir. Nəyə görə Azərbaycan kimi bir ölkədə insanlar evlərindən çölə atılmalıdır?! Bank faizlərinə yenidən baxmaq lazımdır”.
