İraq hökuməti Rusiya ilə bağlanmış 4.2 milyard dollarlıq silah alma müqaviləsini ləğv edib. Səbəb müqavilənin bağlanmasında “sui-istifadəyə” yol verilməsi iddialarıdır.
Hökumət sözçüsü BBC-yə verdiyi açıqlamada baş nazir Nuru əl Malikinin razılaşma ilə əlaqədar istintaq başlatdığını söyləyib.
Döyüş helikopterleri və mərmi kimi silahların alınmasını nəzərdə tutan müqavilə oktyabr ayında imzalanmışdı.
Malikinin sözçüsü AFP xəbər agentliyinə bildirib ki, baş nazir Rusiya səfərindən döndükdən sonra müqavilənin bağlanmasında sui-istifadədən şübhələnib və buna görə də onun yenidən nəzərdən keçirilməsinə qərar verib.
Müqavilə həyata keçsəydi Rusiya İraqa silah satışına görə ABŞ-dan sonra ikinci ölkə olacaqdı. Rusiya Səddam Hüseynin dövründə İraqın ən böyük silah təchizatçısı idi.
Ekspertlər bu müqavilənin imzalanmasını İraqın yenidən Rusiyanın nəzarətinə keçməsi kimi qiymətləndirmişdi. Hərçənd, hələ müqavilə imzalanarkən Maliki məqsədlərinin sadəcə silah təchizatında bir ölkədən asılı qalmamaq olduğunu və Məclisin bu müqaviləni ləğv edə biləcəyini demişdi.
