«Münasibətlər o həddə çatıb ki, onu lobbiçilərə böyük pullar xərcləməklə də düzəltmək olmaz»
Adətən ABŞ-dakı prezident seçkiləri öncəsi hansısa namizədin təbliğat kampaniyasına dəstək verənlər arasında Azərbaycan hökuməti də olurdu. Bu dəstəyin sonradan heç bir nəticə verməyib hədər getməsi məsələnin başqa tərəfidir. Əsas odur ki, hökumət lobbiçilik edənlərin sırasına düşə bilirdi. Birləşmiş Ştatlardakı son seçkidə isə biz Azərbaycan hökumətinin ən xırda təşəbbüsünə belə, rast gəlmədik.
Siyasi şərhçi Rahim Hacıyev deyir ki, bu, ABŞ-ın artıq bir neçə ildir ki, fərqli siyasət yürütməsi ilə bağlıdır:
“2008-ci ildə seçki kampaniyası zamanı Obama belə bir fikir işlətdi ki, o, Ağ evdən lobbiçilərin ayağını kəsəcək. Yəni ABŞ lobbiçilərdən asılı olmayan bir siyasət yürüdəcək, onların ölkənin siyasətinə korrektlər etməsinə imkan verməyəcək. Bu müddət ərzində ABŞ ötən illərdə olduğundan fərqli siyasət yürütdü. 2010-cu ildən başlayaraq dünyada böyük demokratikləşmə dalğasına start verdi. Obama 2010-cu ilin sentyabrında BMT-nin tribunasından çox açıq şəkildə bildirdi ki, ”Ümumbəşəri dəyərləri qəbul etməyən, bu dəyərlərə qarşı çıxan şəxslər bizim düşmənimizdir. Biz bütün dünyada demokratik dəyərlərin yayılmasını istəyirik. Buna müqavimət göstərən qüvvələr var. Biz onlara düşmənə olan münasibəti göstərməliyik”. Bu, yeni eranın başlanğıcının elan edilməsi demək idi”.
R.Hacıyev son illər ABŞ-Azərbaycan münasibətlərinin də xeyli gərginləşdiyini bildirir: “Obama Administrasiya ilə Azərbaycan hökuməti arasında münasibətlər bu müddət ərzində xeyli gərginləşib. Azərbaycan hökumətinin ünvanına çoxlu sərt, tənqidi fikirlər deyilib. Hakimiyyət ABŞ hökuməti ilə münasibətlərin gərginliyini görüb Birləşmiş Ştatlardakı lobbi təşkilatları ilə əvvəlki templə işləməkdən çəkinir. Münasibətlər o həddə çatıb ki, onu lobbiçilərə böyük pullar xərcləməklə düzəltmək olmaz. Ona görə də Azərbaycan hakimiyyəti bu təcrübəyə son qoyub”.
