Keçmiş baş nazirin ölümündə prezidentin əli olduğu iddia edilir
Gürcüstan prezidenti Mixail Saakaşvili, keçmiş baş nazir Vano Merabişvili, hakimiyyət dəyişikliyindən sonra ölkədən qaçan Zurab Adeişvili və parlamentin vitse spikeri Georgi Baramidze 2005-ci ilin fevralında həlak olmuş keçmiş baş nazir Zurab Jvaniyanın ölüm faktı üzrə prokurorluq tərəfindən dindiriləcək.
“Qafqazinfo”nun məlumatına görə, Gürcüstanın yeni baş prokuroru Arçil Kbilaşvili bildirib ki, Jvaniyanın ölümüylə əlaqədar hər kəs, eləcə də Saakaşvili dindiriləcək.
Gürcüstanın sabiq prezidenti Eduard Şvardnadze “Asaval-dasavali” qəzetinə müsahibəsində Jvaniyanın ölümündə Mixail Saakaşvilinin əli olduğuna işarə vurub: “Jvaniya Saakaşvilini prezidentlik postunda əvəz etmək iqtidarında idi. Onun bunun üçün çox böyük şansı var idi. Ona görə də öldürülüb”.
Zurab Jvaniyanın qardaşı Qoqala (Georgi) bəyan edib ki, qətlə hazırkı prezident Mixail Saakaşvili şəxsən rəhbərlik edib. Onun sözlərinə görə, bu “ölüm oyunu” eks baş nazir Vano Merabişvili, hakimiyyət dəyişikliyindən sonra ölkədən qaçan Zurab Adeişvili və parlamentin vitse spikeri Georgi Baramidze tərəfindən “səhnələşdirilib”.
Xatırladaq ki, Zurab Jvaniya və onun partiya tərəfdaşı – Kvemo-Kartli regionunun qubernator müavini Raul Usubovun meyiti 2005-ci il fevralın 3-də səhər saatlarında Tbilisinin mərkəzindəki mənzilində tapılıb. Rəsmi məlumatlarda onların dəm qazından zəhərləndiyi açıqlanıb.
Informasiya şöbəsi
