Müxalifət düşərgəsindən bu açıqlamaya cavab gecikmədi
Milli Məclisdə “Sərbəst toplaşmaq azadlığı haqqında” qanuna əlavə və dəyişikliklər edilməsi haqda layihənin müzakirəsi zamanı deputatlar icazəsiz aksiyalarda iştiraka görə tətbiq edilən cərimələr haqda danışıblar.
Deputat Aydın Mirzəzadə aksiyaların icazə verilmiş yerlərdə keçirilməsini mütləq sayaraq, cərimələrin tətbiqini məqbul hesab edib. Onun sözlərinə görə, aksiya işitirakçıları 10-15 manat cərimə verəndən və həbs müddətini bitirəndən sonra özlərini qəhrəman kimi aparır. A.Mirzəzadənin fikrincə, cərimələrin azlığı bu sahədəki problemi yetərincə həll etmir və bu mənada sözügedən məsələdə daha sərt mövqe tutulmalıdır.
AXCP sədrinin müavini Gözəl Bayramlı həmin məqama şərh verərək bildirdi ki, ölkədə heydərizmə qarşı mübarizə aparan insanları elə qəhrəman hesab etmək olar: “Azərbaycan hakimiyyəti demokratik dünyadan sürətlə uzaqlaşır. Insanlar öz etirazını bildirməməli, haqq səsini deməməlidir? Konstitusiyanın 49-cu maddəsi vətəndaşlara sərbəst toplaşmaq hüququ verir. Məgər Aydın Mirzəzadə bilmir ki, müzakirə etdikləri qanun Konstitusiyaya ziddir? Onlar bu cür açıqlamalarla özlərinə haqq qazandırmaq istəyirlər. Amma əslində, Aydın Mirzəzadənin özünə də aydındır ki, bu dəyişiklik niyə edilir. Məqsəd odur ki, xalq bu mübarizəyə qoşulmasın. Onsuz da bu hakimiyyəti qəbul etməyən xalq ona qarşı mübarizəyə qoşulacaq. Nə qədər cərimələr olsa da, onu artırsalar da, ayağa qalxan xalqın qarşısında dayana bilməyəcəklər”.
Müsavat başqanının müavini Gülağa Aslanlı da Aydın Mirzəzadənin dediklərini şərh edərkən bir daha vurğulayıb ki, insanların sərbəst toplaşmaq azadlığına məhdudiyyət qoyulmamalıdır. Çünki bu, insanların konstitusion haqqıdır və heç bir bəhanə ilə məhdudlaşdırıla bilməz: “Bakı şəhərində 11 inzibati rayon olduğu kimi, yürüş və mitinq üçün də 11 yer ayrılmalıdır. Bakı Şəhər Icra Hakimiyyəti bu yerləri ayırmır. Parlamentin srağagünkü iclasında S.Novruzov Bakıda beş belə yer olduğunu desə də, həmin yerlərin hansılar olduğu heç Bakı Şəhər Icra Hakimiyyətinin özünə də məlum deyil. Parlamentarilər sərbəst toplaşmaq azadlığına hörmətlə yanaşmalıdır. Amma görünür ki, hakimiyyət 50 nəfərin bir yerə toplaşmasından qorxur”.
G.Aslanlı insanların bir yerə toplaşmasından hakimiyyətin xoflandığını qeyd edərək, iqtidar təmsilçilərinə həqiqətin gözünə bir az ədalətlə baxmağı tövsiyə etdi.
Nigar
