Onların yerində yeni tikililər inşa ediləcək
Bakının 3-cü mikrorayon ərazisindəki beşmərtəbəli binalar sökülə bilər. “Trend”in məlumatına görə, bunu “Bakıdövlətlayihə” Institutunun direktoru Ilqar Isbatov deyib. Onun sözlərinə görə, həmin binaların yerində yeni tikililərin inşası nəzərdə tutulub.
Seysmoloji vəziyyətə dayanıqlığı və həmin binaların öz ömrünü başa vurması məsələsinə şərh verən iqtisadçı-ekspert Zöhrab Ismayıl deyir ki, “xruşşovka”ların ömrü cəmi 50 ildir. Buna görə də həmin binaların sökülməsi ideyası meydana gəlib.
Ekspertin sözlərinə görə, həmin binaları kor-koranə sökmək də düzgün deyil: “Bu iş dəqiq bir proqram əsasında həyata keçirilməlidir. Bu gün Bakıda bir, ikimərtəbəli binalar var ki, onların yerində yenisini tikmək olar. ”Xruşşovka”lar beşmərtəbəli olduğundan onların yerində 9-12 mərtəbəli binaların tikilməsi məqsədəuyğundur. Bu məsələ uzun müddətdir ki, müzakirə olunur. Məlumdur ki, Bakı şəhərinin baş planı hazırlanır və bu məqam da həmin plana aiddir”.
Ekspert əlavə etdi ki, “Xruşşovka” və digər layihəli binalar öz ömrünü başa vurduğu üçün əslində, sökülməsi məqbuldur. Çünki onlar ucuz materialdan tikilib, keyfiyyəti illər keçdikcə itib və seysmoloji standartlara uyğun gəlmir.
Nigar
