Riçard Morninqstar: “Xankəndi aeroportunun açılması sülh prosesinə mənfi təsir edəcək”
ABŞ-ın Azərbaycandakı səfiri Riçard Morninqstar Ermənistanın Azərbaycanın işğal altında olan Xankəndi şəhərində yerləşən hava limanını istismara vermək haqqında qərarına münasibətini açıqlayıb. Səfir bu qərarın nəticələrinin xoşagəlməz olacaği barədə xəbərdarlıq edib.
Xatırladaq ki, Ermənistan Azərbaycanın işğal altında olan ərazilərində inşa edilmiş Xankəndi aeroportunun istismara verildiyini bildirib. Rəsmi Bakı, Xankəndində aeroportun açılmasını danışıqlar prosesinə ciddi zərbə kimi qiymətləndirərək, mülki aviasiyaya dair Çikaqo Konvensiyasına zidd olduğunu bəyan edib.
Riçard Morninqstar: “Mən bir şeyi əminliklə deyə bilərəm ki, əgər həmin hava limanı fəaliyyət göstərsə bu, sülh prosesinə kömək etməyəcək. Bu məsələdə ABŞ-ın mövqeyi ondan ibarətdir ki, hər iki tərəf bu məsələni beynəlxalq hüquq normalari çərçivəsində həll etməlidir. Yenə təkrarlayıram ki, həm Minsk qrupunun, həm diqərlərin bəyanatlarında deyildiyi kimi hava limanından hər hansı bir uçuş sülh prosesinə mənfi təsir edəcək”.
İnformasiya şöbəsi
