Təranə Əliyeva: «Bu qanunsuzluq ilk dəfə deyil və bu barədə müvafiq məhkəmə qərarı da var»
Kriminal aləmdə “Lotu Quli” kimi tanınan Nadir Səlifovun vəkili Təranə Əliyeva 8 saylı cəzaçəkmə müəssisəsinin rəisinin vəzifələrini icra edən Murtuz Sadıxovdan şikayətçidir. Vəkil ölkə başçısı da daxil olmaqla, müxtəlif instansiyalara ünvanladığı şikayət məktubunda göstərib ki, ona hüquqlarını müdafiə etdiyi şəxslə görüşməyə imkan verilmir. Nadir Səlifovun saxlanıldığı 8 saylı cəzaçəkmə müəssisəsinin rəhbərliyi ən müxtəlif bəhanələrlə məhkumla vəkilin görüşünə süni maneələr yaradır.
“7 ildir Nadir Səlifovun vəkiliyəm. Hər dəfə onunla görüşə gedəndə cəzaçəkmə müəssisəsinin nəzarət buraxılış məntəqəsində, orada olan video kameraların önündə mənim üst geyimim yoxlayıcı aparat vasitəsilə yoxlanılıb, bundan sonra içəri keçmişəm. Həmin yoxlamalar bəzən qadın, bəzən də kişi əməkdaşlar tərəfindən keçirilirdi və bu zaman mənimlə həmin əmədaşlar arasında heç bir problem olmurdu. Sonuncu dəfə mənə bildirildi ki, nəzarət-buraxılış məntəqəsində yox, içəridə olan otaqda məni yoxlamalıdırlar. Təklif etdim ki, o zaman üzərimə baxış hal şahidlərinin iştirakıyla, protokol tərtib edilməklə və ya nəzarət-keçid məntəqəsindəki kameraların qarşısında keçirilsin. Lakin müəssisə əməkdaşları mənimlə razılaşmayaraq bildirdilər ki, bu cür yoxlama ”yuxarı”dan verilən göstərişə əsasən keçirilir. O gündən bəri qanunsuz tələbə qarşı çıxdığıma görə Murtuz Sadıxovun göstərişilə müvəkkilimlə görüşməyimə icazə vermirlər”, – deyə Təranə Əliyeva bildirib.
Vəkil onu da qeyd edir ki, Murtuz Sadıxov bir müddət əvvəl də ondan hüquqlarını müdafiə etdiyi şəxslə iki hissəyə bölünmüş görüş otağında dəmir, plastik və şüşədən düzəldilmiş barmaqlıq arxasından, özü də telefon vasitəsilə danışmaq məcburiyyətində qalmaqla görüşməyini tələb edib. Lakin bununla bağlı məhkəməyə müraciət etdikdən sonra Murtuz Sadıxov bu qanunsuzluğa son qoyub və məhkəmə tərəfindən qərar qəbul edilib.
Penitensiar Xidmətin ictimaiyyətlə əlaqələr şöbəsinin rəisi Mehman Sadıqov şikayətlə əlaqədar müvafiq araşdırma aparıb, tədbirlər görəcəklərini deyib: “8 saylı müəssisə xüsusi cəzaçəkmə müəssisəsidir. Orada məhkəmə tərəfindən xüsusi təhlükəli hesab edilən məhbuslar saxlanılır. Həmin müəssisədə saxlanma şəraiti fərqlidir. Ona görə də hər bir iş daxili intizam qaydalarına uyğun şəkildə həyata keçirilir. Biz yenə də şikayətlə bağlı araşdırma aparacaq və lazım olan tədbirləri görəcəyik”.
Qeyd edək ki, dünən N.Səlifovla görüşə gedən digər qadın vəkili Gülnarə Xudabaxışova da eyni problemlə üzləşib və o da baş verənlərlə bağlı şikayət etmək fikrindədir.
Aytən
