“Avropalı deputatlar Azay Quliyev kimi ora-bura kürü daşımırlar”
“Bu yaxınlarda AŞPA-nın 11 deputatı yoxlanılmamış qərəzli mövqedən çıxış edərək Zülfüqarlı qardaşlarının mülkiyyətinə qəsd edilməsi ilə bağlı iddialarla Azərbaycan Prezidentinə müraciət etmişdilər. Onların mövqeyindəki qərəz açıq aydın hiss olunur. AŞPA deputatlarının özəl mülkiyyət çəkişməsinə birdən birə belə maraq göstərməsinin, beynəlxalq səviyyədə lobbiçilik etməsinin əsl səbəbi nədir?”. Bu fikirləri “Qafqazinfo”ya açıqlamasında Milli Məclisin deputatı, Prezident yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev Zülfüqarlı qardaşlarının işi ilə bağlı AŞPA deputatlarının prezidentə müraciətini şərh edərkən bildirib.
Onun sözlərinə görə, araşdırma zamanı müəyyən olunub ki, hazırda həmin iş Ali Məhkəmənin baxışındadır və bu cür bəyanatlar məhkəməyə təzyiq kimi qiymətləndirilə bilər: “Həmin deputatların mənsub olduğu ölkələrin xarici işlər nazirliklərindən, AŞPA Prezidenti və Baş Katibindən izahat istənilməlidir. Məsələnin hüquqi müstəvidə məhkəmə qaydasında həlli mümkün olduğu halda AŞPA deputatlarının kiminsə şəxsi biznes problemləri ilə məşğul olması nə dərəcədə onların vəzifə öhdəlikləri ilə uyğunlaşır, azərbaycanlı iş adamlarının şəxsi lobbiçiləri rolunda çıxış etmək istəyi haradan qaynaqlanır? Bəlkə onlar təsiri altında olduqları erməni lobbisinin növbəti sifarişi əsasında Azərbaycanı qaralamaq öhdəliyini yerinə yetirirlər?” .
Zülfüqarlı qardaşlarının vəkili Aslan İsmayılov isə A.Quliyevin fikirlərini absurd adlandırıb: “Azay Quliyev əli girmədiyi yerə başını soxmasın. Əvvəlcə getsin öz vəzifəsini yada salsın. O, Milli Məclisin deputatıdır, mülkləri zorla sahibkarların əlindən alan şəxslərin vəkili deyil. Azay Quliyevin ingilis dilində danışması onun savadlı olması demək deyil. Bir balaca savadı olsaydı, bilərdi ki, Azərbaycan Avropa Şurasının üzvüdür və mülkiyyət hüququnun qorunması haqda Avropa Konvensiyasının bir nömrəli əlavəsini imzalayıb. Bu səbəbdən də mülkiyyət hüququnun toxunulmazlığını təmin etməlidir. Əgər Azərbaycan hakimiyyəti bunu təmin etmirsə, AŞPA-nın deputatlarının buna birbaşa müdaxilə edib prezidentə müraciət etmək hüququ var. Azay Quliyev Azərbaycan məhkəmələrinə istinad edib deyir ki, iş məhkəmədədir. 2005-ci ildə Zülfüqarlı qardaşlarını qanunsuz həbs edib və sonra da mülklərinin 80 faizini əlindən alanları elə Azərbaycan məhkəmələri buraxıb. Bu yaxınlarda Azay Quliyev bəzi məhkəmə işçilərinin etirafını eşidəcək ki, sifarişlə insanları həbs edib, bir qəpik də pul almayıblar. Əvəzində isə həbs etdirənlər milyonlar alıblar. Azay Quliyev bu cür danışmaqdansa getsin, “kürü diplomatiyası” biabırçılığına görə sussun. Bu sırf hüquqi müstəvidə olan işdir. Avropalı deputatlar Azay Quliyev kimi ora-bura kürü daşımırlar”.
