Milli Məclisin plenar iclasında “Sərbəst toplaşmaq azadlığı haqqında” qanuna dəyişikliklər edilib. Dəyişikliklərə əsasən, razılaşdırılmamış aksiyalara görə cərimələr təxminən 30 dəfə artırılıb.
“Hakimiyyət heç cür anlamaq istəmir ki, yumruğa, zora söykənən sabitlik bir gün mütləq dağılacaq”
Hüquq müdafiəçisi İntiqam Əliyev Deyerler.Org-a açıqlamasında deyib ki, baş verənlərin hüquqiliyi ilə bağlı müzakirə mənasız bir şeydir. Onun sözlərinə görə bu bir özbaşınalıqdır. “Baş verənlər bir daha göstərdi ki, bu hakimiyyətin islahat-filan aparmaq fikri yoxdur. Bu parlament prezident aparatının göstərişlərini icra edən oyuncaq bir qurumdur. Bu, bir daha göstərdi ki, hakimiyyət öz xalqından qorxur. Hökumət bu addımı ilə bir daha ölkənin siyasi, iqtisadi, sosial və digər sahələrində hüquq və azadlıqları, o cümlədən demokratiyanın təməl prinsiplərindən sayılan sərbəst toplaşmaq və ifadə azadlığını təmin etmək fikri yoxdur.
Bu hakimiyyət fərqli sözü, etirazı kriminal kimi qəbul edir. O, korrupsiyaya, seçki saxtakarlığına, hakimiyyətin uzurpasiyasına, elmin, təhsilin, mədəniyyətin məhv edilməsinə və s. etiraz edən insanlara cinayətkar kimi baxır. Baş verənlər hakimiyyətin kriminallaşmasının göstəricisidir. Ona görə də bütün problemləri kriminal yolla həll edir.
Hakimiyyət qanunları sərtləşdirməklə, cərimələri artırmaqla, insanları həbsxanalara doldurmaqla cəmiyyətin gözünü qorxutmaq, insanları fəallıqdan çəkindirmək istəyir. O, heç cür anlamaq istəmir ki, yumruğa, zora söykənən sabitlik bir gün mütləq dağılacaq. O zaman nəticələr həm ölkə üçün, həm də insanları, cəmiyyəti mübahisələri sivil yolla deyil, “dubinka” ilə həll etməyə alışdırmış hakim elita üçün çox ağır ola bilər”, -deyə İntiqam Əliyev bildirib.