Media Hüququ Institutu: «Tezliklərin verilməsi ilə bağlı müsabiqələr şəffaf və ədalətli olmayıb»
Teleradio yayımı üçün tezliklərin verilməsi şəffaf və ədalətli, ən yaxşı iddiaçıların müsabiqəyə qatılmasına imkan verən yolla həyata keçirilməlidir. Əks halda tezliklərdən səmərəli istifadə, plüralist və peşəkar, rəqabətli teleradio yayımı mühiti yaradılmasıyla bağlı qanuni meyarlar kağız üzərində qalmış olacaq.
Bu barədə Media Hüququ Institutunun Milli Televiziya və Radio Şurasının oktyabrın 18-də Gəncədə regional radionun yayımı üçün tezliyin verilməsinə dair müsabiqə elan etməsi ilə bağlı bəyanatında bildirilir.
MHI hesab edir ki, müsabiqənin potensial iştirakçılarına zəruri hazırlıq üçün yetərli zaman verilməyib. Müsabiqənin tələm-tələsik keçirilməsi onun nəticələrinə zərər vura bilər. Gəncə radiosu Bakı və Naxçıvandan kənarda ilk radio yayım kanalı olacaq. Radio yayımı üçün 93.3 MHz işçi tezliyi üzrə müsabiqəyə sənəd qəbulu noyabrın 22-dək davam edəcək.
MHI həmçinin xatırladır ki, MTRŞ-nin tezliklərin verilməsi ilə bağlı əvvəlki müsabiqələri də şəffaf və ədalətli olmayıb. Müsabiqələrin aydın qiymətləndirmə meyarları olmadan keçirilməsi əsaslandırılmamış, narazılıq doğuran qərarların çıxarılması ilə nəticələnib.
Odur ki, MHI MTRŞ-ni qanuni vəzifələrini yerinə yetirməyə, yayım tezliklərinə iddialı olanlara əlverişli, bərabər və ədalətli şərait yaratmağa, müsabiqələrin şəffaflığını və etibarlılığını təmin etməyə çağırır(Turan).
