“Səid Dadaşbəylinin dəstəsi”nin Müdafiə Komitəsi Səidə Qocamanlını yalançı adlandırdı
Siyasi məhbus ailələri ilə hüquq müdafiəçiləri Novella Cəfəroğlu, Səidə Qocamanlı və Səadət Bənənyarlı arasında qalmaqal davam edir. Xatırladaq ki, “Səid Dadaşbəylinin dəstəsi” adlandırılan 10 siyasi məhbusun Müdafiə Komitəsi adıçəkilən hüquq müdafiəçilərini Avropa Şurasının (AŞ) Bakıdakı nümayəndəliyində AŞ baş katibinin müavini Qabriela Battaini-Draqonini və AŞ-nin siyasi məsələlər üzrə direktoru Aleksandr Qussellə görüşdə səsləndirdikləri fikirlərə etiraz olaraq bəyanat yaymışdı. Həmin bəyanatda hüquq müdafiəçiləri ittiham edilirdi: “Təəssüf ki, Azərbaycanın insan hüquqlarını müdafiə edən bir sıra təşkilatları gənclərin istintaq və məhkəmələrdə üzləşdiyi özbaşınalıqlara gec reaksiya verdilər. Hətta Hüquq Müdafiəçilərinin Monitorinq Qrupunu təmsil edən xanım hüquq müdafiəçiləri mətbuatın 5 ildən çox işıqlandırdığı qanunsuzluqlara verdiyi reaksiya baş verənlərə adekvat deyildi. Konkret olaraq, hüquq müdafiəçisi Səidə Qocamanlı yerli mətbuatda və beynəlxalq təşkilatların üzvləri ilə görüşdə “Səid Dadaşbəyli və onun dəstəsi” adı altında həbs olunanları siyasi məhbus kimi qəbul etmədiklərini gizlətmirdi. Novella Cəfəroğlunun mövqeyi isə qeyri-müəyyəndir, o, bizlərlə görüşdə övladlarımızın günahsız olduğu üçün azad edilməsini, hətta onlara vicdan məhbusu statusunun verilməsinin vacibliyini söyləsə də, həmkarı Səidə Qocamanlının fikirlərinə heç bir reaksiya vermirdi. Biz hələ də Səidə Qocamanlının bu mövqeyinin hansı məqsədə xidmət etdiyini və kimin siyasi sifarişini yerinə yetirdiyini bilmirik. O cümlədən Novella Cəfəroğlunun bu məsələ ilə bağlı qeyri-müəyyən münasibəti anlaşılmazdır”.
Lakin Səidə Qocamanlı “Yeni Müsavat” qəzetinə açıqlamasında Müdafiə Komitəsini qeyri-obyektivlikdə suçlayıb. Bu məhbus ailələrini daha da hiddətləndirib və Müdafiə Komitəsi yenidən mövzuya qayıdıb: “Siz narazılıq edirsiniz ki, verdiyimiz bəyanat qeyri-obyektivdir. Səidə Qocamanlı, bəs sizin “Yeni Müsavat”a verdiyiniz müsahibə nə qədər obyektivdir?
Siz deyirsiniz ki, Səid Dadaşbəyli və onunla birgə həbs olunanları vicdan məhbusu elan etmişik və dünya da bunu bilir. Səidə xanım, bu cür yalan nə sizin yaşınıza, nə də ki, tutduğunuz vəzifəyə uyğun gəlir. Şəxsən Siz heç onları vicdan məhbusu kimi tanımaq da istəməmsiniz. Monitorinq Qrupundan yalnız Novella xanım Cəfəroğlu onların vicdan məhbusu olduğunu etiraf edib və bununla bağlı imzasını atıb. Qaldı ki, siyasi məhbus məsələsinə 2007-ci il noyabr ayında məhkəmə zamanı hakim Ənvər Seyidov öz fasiləsində mühakimə olunanların bütün valideynlərini, qohum əqrəbələrini bir araya alıb, etiraf etdi: “Sizin övladlarınız günahsızdırlar, onlar siyasi oyunların qurbanıdırlar”.
Unutmamısınızsa, 2009-2012-ci ilə kimi Monitorinq Qrupu xaricə gedərkən bizdən iş barəsində ingilis dilində yazılar götürürdünüz. Bu yazıları Avropa Şurasının nümayəndələrinə, İnsan haqları üzrə komissar Tomas Hammembergə çatdıracağınızı söyləyirdiniz. Deyirdiniz ki, əgər onlar Sizin uşaqlarınızı siyasi məhbus siyahısına salsalar, biz də onları öz siyahımıza salacağıq. Nəhayət, Səid Dadaşbəyli və onunla birgə həbs olunanlar Kristofer Ştrasserin məruzəsində əksini tapan meyarlara uyğun gəldiyindən, onlar siyasi məhbus siyahısına salındılar. Onlar siyasi məhbus statusu aldıqlarına görə Siz niyə narahat olmusunuz? Dörd ədalətsiz məhkəmədən keçmişik, heç bir şəffaf məhkəmə də istəmirik, imkanınız var onları azad etdirin, əks halda biz Avropa Məhkəməsini gözləyirik”.
