Deputat Adil Əliyev onu başının kəsilməsilə hədələdi
Parlamentin dünənki iclasında deputatların mediada Milli Məclisin tənqid olunması haqda məsələni müzakirəyə çıxarmasına sosial şəbəkələrdə münasibət bildirilib.
Respublikaçı Alternativ (REAL) Hərəkatının sədri İlqar Məmmədov öz bloqunda parlamenti aşağılayan status yazıb:
“Mən Azərbaycan parlamentini bu yazı ilə təhqir edirəm. Yaxşı edirəm. Çünki Azərbaycan parlamenti böyük əksəriyyəti fırıldaq adamların toplaşdığı bir zooparkdır. Orta əsrlərdə hər şah öz yanında bir zoopark saxlayarmış, bu da o növdəndir.
Milli Məclis – onun təyin olunma qaydası, onun iş prinsipləri, onun danışdığı fikirlər, onun sürdüyü maşınlar, onun mindiyi eşşəklər – hamısı Azərbaycan adlı ölkə üçün bir təhqirdir.
Özünü millətin adından danışan kimi göstərən bu zoopark, Azərbaycanda inqilab mahiyyətli dəyişikliklər nəticəsində həbs edilməlidir. Onun buraxılması haqda tələblər mənasızdır – zooparkın birini digərilə əvəz etməyin nə xeyri, əgər ikisi də şahlıq sisteminə xidmət edəcəklərsə…
Eşitdim ki, zooparkdakı bəzi ünsür geninə-boluna özlərini təhqirdən qorumağı xahiş ediblər şahdan. Guya bunların şahından qorxan var. Zooparksınız ki, zoopark!”
REAL sədrinin fikirlərinə deputat Adil Əliyev münasibət bildirib. O, “qafqazinfo”ya açıqlamasında bildirib ki, şəxsən bu təhqirləri özünə qarşı qəbul etmir: “Hər hansı ittihamda konkret ünvan göstərilməlidir. Ümumi Milli Məclis adına deyilən bu sözləri başa düşmürəm. Belə danışmaq üçün adamın iki başı olmalıdır. Onu da kəsib atarlar”.
Başqa bir deputat Fazil Müstafa da “qafqazinfo”ya açıqlamasında deyib ki, parlamentin formalaşma prinsipləri kimisə qane etməyə bilər: “Oradakı müəyyən şəxslərdən kimsə narazı qala bilər. Amma bunu ümumilikdə bütöv parlamentin adına səsləndirmək böyük tərbiyəsizlikdir. Dövlət qurumlarına hamı etik çərçivədə münasibət göstərməlidir. Hər yoldan ötənin onu təhqir etməsinə imkan vermək olmaz. İlqar Məmmədov indi Milli Məclisdə təmsil olunsaydı, 125 deputat içərisində bəlkə də heç 123-cü yerdə də olmazdı. Çünki onun səviyyəsi bura qədər çatır”.
