“Hökumətə mesaj oldu ki, qadağalar, repressiyalar, zorakılıq Azərbaycan xalqını öz hüquqları uğrundan mübarizədən çəkindirə bilməyəcək”
AXCP sədri Əli Kərimli bu gün Milli Məclisin qarşısında keçirilən aksiyaya münasibət bildirib. Əli Kərimli əvvəlcə yağışlı hava olmasına baxmayaraq, eitraz aksiyasına çıxan müxalif fəallara, ictimaiyyət nümayəndələrinə təşəkkürünü çatdırıb: “Bugünkü yağışlı havada vətəndaş hüquqları uğrunda fədakarlıq, şəxsi nümunə göstərib piketdə iştirak edən hər kəsə təşəkkürümü bildirirəm. Onlar yüksək siyasi yetkinlik göstərərək, təkcə özləri və yaxınları qarşısında yox, Azərbaycan xalqı qarşısında məsuliyyət hiss edərək, mərhumiyyət yaşadılar. Amma eyni zamanda bu fədakarlığı etməklə Azərbaycan cəmiyyətinin mübarizə əmzini ortaya qoydular”.
AXCP lideri dinc etiraz aksiyalarının keçirilməsinə qeyri-rəsmi qadağa qoyan Azərbaycan hökumətinin ünvanına da sərt ittihamlar səsləndirdi: “Azərbaycan hakimiyyəti qorxu içindədir. Xüsusilə son videoların yayılmasından sonra hakimiyyət də fərqindədir ki, Azərbaycan xalqı ona əsasən oğru, cinayətkar mahiyyətli hakimiyyət kimi baxır. İndiəyə qədər xalqımızın güman etdiyi həqiqətlər yüksək səviyyədə təsdiqlənir. Məlum olur ki, Azərbaycan hökuməti seçkiləri saxtalaşdırır, hüquq mühafizə orqanlarından cəza aparatı kimi istifadə edir. Hətta insan oğurluğu kimi ağır cinayətlərdə bu orqanların rəsmiləri iştirak edir. İnsanlar bu orqanlara rüşvət müqabilində işə götürülür. Ölkədə seçkiləri bir nəfər həyata keçirir. Bu həqiqətləri bütün Azərbaycan xalqı bilir”.
Etiraz aksiyalarında iştiraka görə cərimələrin artırılması haqda qanunun qəbuluna toxunan Əli Kərimli bildirdi ki, Azərbaycan hökuməti xalqın etiraz dalğasının güclənəcəyindən çəkindiyi üçün önləyici addımlar atır: “Azərbaycan hökuməti çalışır ki, cəmiyyətdə etirazların kütləviləşməməsi üçün önləyici tədbirlər görsün. Mütəmadi repressiyalar, müxalifətə qarşı ən müxtəlif təxribatların hazırlanması, o cümlədən qanunvercilikdə geriyə addımların atılması, Azərbaycanı sivil dünyadan uzaqlaşdıran hərəkətlər bu qorxunun təzahürüdür”.
AXCP sədri eyni zamanda deyilən qanunu qəbul etməsini hakimiyyətin növbəti ciddi səhvi adlandırıb. Onun sözlərinə görə, belə üsullarla indiyə qədər heç kim vaxtı keçmiş hakimiyyətini qoruya bilməyib. “Azərbaycan hakimiyyətinə də bu müyəssər olmayacaq. Əksinə, bu qanunun qəbul edilməsi bir tərəfdən beynəlxalq birliyin diqqətini yenidən Azərbaycandakı rejimə cəlb edəcək. Digər tərəfdən Azərbaycan xalqı da daha yaxşı fərqində olacaq ki, bu ölkəni xilas etmək yükünü az sayda fədakar insanların çiyninə qoymaq düzgün deyil. Kütləvi keçirilən aksiyalarda hamılıqla iştirak olsa, heç kəsi cərimə edə bilməzlər. Böyük dəyişikliklərin önü açılar.
Azərbaycan hökumətinin xalqa verdiyi mesaj bundan ibarətdir ki, əgər siz aksiyalara az-az gəlsəz, yüzlərlə adamla çıxsaz, biz sizi ağır cərimələrə məruz qoyacağıq. Cərimələrdən yayınıb həm də etiraz etməyin yolu kütləvi şəkildə bu etriaz aksiyalarına çıxmaqdan keçir. Hesab edirəm ki, bugünkü yağışlı gündə keçirilən etiraz aksiyası Azərbaycan cəmiyyətinin müqavimət, mübarizə potensialını nümayiş etdirdi. Hökumətə mesaj oldu ki, belə qadağalar, repressiyalar, zorakılıq Azərbaycan xalqını öz hüquqları uğrundan mübarizədən geri çəkindirə bilməyəcək”, – deyə AXCP sədri bildirdi.
