«Fövqəlnazir» qoçu dəstələrinin sayının artırmaq üçün FHN-də İdman Klubu təsis edib
Fövqəladə Hallar Nazirliyinin (FHN) Idman Klubu idmanın müxtəlif növləri üzrə idmançı hazırlayır. Bu sıraya əsasən boks, güləş, taekvando, cüdo və atletika növləri daxildir. Bunu Azərbaycan Taekvando Federasiyasının (ATF) birinci vitse-prezidenti Füzuli Musayev quruma yeni təyinatla bağlı açıqlama verərkən deyib.
Xatırladaq ki, əvvəllər ATF-də məsul katibi postunu tutmuş Nağı Səfərov qurumun vitse-prezidenti təyin edilib.
Füzuli Musayevin açıqlamasında diqqət çəkən məqam FHN-nin Idman Klubu ilə bağlı söylədikləridir. Məlumat üçün deyək ki, Taekvando və Boks federesiyalarının prezidenti fövqəladə hallar naziri Kəmaləddin Heydərovdur. Lakin indi bəlli olur ki, Kəmaləddin Heydərov bu federasiyalarla kifayətlənməyərək FHN-də ayrıca idman klubu yaradıb. Bu idman klubunun FHN-nin fəaliyyətinə hansı töhfələr verəcəyi aydın deyil. Doğrudan da, FHN-nin güləşçiyə, boksçuya, cüdoçuya nə ehtiyacı var? Əlbəttə hər bir qurumda həvəskarlar üçün idman klubu yaradıla və həmin qurumun əməkdaşları həmin klublarda sağlamlıqlarının qeydə qala bilər. Lakin Füzuli Musayevin sözlərindən belə anlaşılır ki, bu peşəkar idmançı yetişdirən bir klubdur.
Bəllidir ki, Azərbaycanda hər bir oliqarx-məmurun, o cümlədən Kəmaləddin Heydərovun idmançılardan ibarət qoçu dəstələri var. Görünür, “fövqəlnazir” indi qoçularının sayının artırmaq, idmançılardan ordu yaratmağı düşünür.
Azad
