Vicdan məhbusu Şahin Həsənlinin anası: «Onun haqqında məndən yox, dostlarından soruşun»
Şahin Həsənli! Yəqin ki, bu ad sizə tanışdır. Iki ilə yaxındır ki, “Azadlıq”ın üçüncü səhifəsinin yuxarı hissəsini onun şəkli bəzəyir. Ictimai Palatanın ötən il 2 aprel aksiyasına görə ilk tutulan məhz Şahin Həsənli oldu. Həmin ilin martın 31-də Şəmkir rayonunda saxlanılan AXCP Rəyasət Heyətinin üzvü barəsində Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddəsi ilə cinayət işi açıldı. Siyasi sifarişlə həbs olunan Şahin Həsənlinin azad ediləcəyini, məhkəmənin ədalətli qərar verəcəyini gözləmək sadəlövhlükdən başqa bir şey deyil. Elə də oldu və ona 2 il həbs cəzası verildi. Indi Qaradağ rayonunda yerləşən 14 saylı Cəzaçəkmə Müəssisəsində məhbus həyatı yaşayır.
Övladları üçün apardığı uşaqlıq şəkilləri…
Şahin Həsənlinin Biləcəridəki ata evinə gedib, anası Ramizə Həsənovayla söhbət eləmək istədik. Vicdan məhbusunun uşaqlıq illərindən tutmuş bu günə kimi baş verənlərdən…
Xəbərsiz getdiyimiz üçün heç nədən məlumatlı deyildik. Sən demə, Ramizə xanım xəstə imiş. Insult keçiribmiş. Çətin də olsa onun iki-üç dəqiqəlik söhbət edirik. Deyir ki, Şahin uşaq vaxtı sakit olub. Nə ailəsini, nə də bir başqasını incidib: “Sakit bir uşaq idi. Heç kimlə işi olmazdı. Günü ancaq dərsləriylə keçirərdi. Buna görə də orta məktəbi və universiteti əla qiymətlərlə bitirdi. Həyatını dərslərə sərf etdiyi üçün o biri uşaqlar kimi çılğın bir həyatı olmayıb. Həyəti düşüb qonşunun uşaqlarıyla oynasın, yaxud dəcəl işlər görsün – bu onun təbiətinə uyğun deyildi. Uşaqlıqda bircə dəfə də olsun kiminsə ondan şikayət etdiyinin şahidi olmamışam. Məktəbdə də müəllimlərin ondan narazı olduğu bir an belə olmayıb. O, həmişə başqalarına nümunə olub”.
Ramizə xanım daha danışa bilmir. Həm xəstəlik, həm də oğlunun qanunsuz yerə dörd divar arasına salınması dilinin söz tutmasına imkan vermir.
“Bala nə danışım eee. Hər şey göz önündədir. Şahin haqda məndən yox, dostlarından soruşun, sizə hər şeyi danışacaqlar”.
Sonuncu xahişi Ramizə xanımdan edirik. Bizə Şahin Həsənlinin uşaqlıq şəkilləri lazımdır. Məlum olur ki, vicdan məhbusu bir neçə il öncə şəkillərini öz evinə aparıb. Uşaqlarının baxması üçün…
Bəli, biz də anaya çox əziyyət verməyib, cəbhəçinin ata evini tərk edirik.
Millətin genefondu…
Redaksiyaya dönürük. Yolda təsadüfən qarşımıza AXCP sədrinin müavini Gözəl Bayramlı çıxır. Hal-əhval tutduqdan sonra hardan gəldiyimizi ona deyirik. “Şahin Həsənli” kəlməsi dilindən çıxan kimi “ikinci nəfəsi” açılır Gözəl xanımın. Deyir ki, Şahin bəy AXCP-də ən çox sevdiyimiz dostlarımızdan biridir: “Səmimi, dürüst, dostluğa sədaqətli, əqidəsinə sadiq bir cəbhədaşdı. Onunla bir çox aksiyaların, tədbirlərin hazırlanmasında iştirak etmişəm. Dəfələrlə rayonlarda bir yerdə ezamiyyətlərdə olmuşam. Əvəzsiz bir dostdur, qayğıkeş bir insandır”.
Gözəl xanım yarızarafat-yarıciddi söyləyir ki, Qadınlar Şurasında Şahin bəyə xanımlarımızın ən yaxın dostu adını vermişdik: “Bizə qarşı o qədər səmimi, o qədər mədəni olub ki… O, yüksək mənəvi dəyərlərə, əxlaqa sahib bir insandır. Istənilən problem üçün düşünmədən ilk müraciət edəcəyimiz dostlardan biri, bəlkə də birincisi olub Şahin bəy. Şəmkirdə, Gəncədə məhkəmələrində çox iştirak etmişəm. Gəncədə və hazırda saxlandığı cəzaçəkmə müəssisəsində də dəfələrlə görüşmüşəm. Mən bu insanın səbrinə, dözümün heyranam. Hər dəfə də deyib ki, özümü həbs müddətim başa çatana qədər burda olmağa hazırlamışam”.
“Şahin bəy kimi insanlar bu millətin genefondudur. Onun kimi şəxsiyyətlərin fədakarlığı sayəsində bizlər üçün həbs adiləşib. Ideya insanı, vətənini sevən şəxsiyyət deyəndə mən Şahin bəyi düşünürəm, çünki bunu özü qazanıb. Şahin bəy ailəsində bir böyük kimi onun fikirlərinə hörmətlə yanaşılıb, onun məsləhətləri əsas götürülüb. Özüm bunun dəfələrlə şahidi olmuşam. Övladlarının təhsili üçün əlindən gələni edib, anasının, bütün ailəsinin qayğısı həmişə onun üzərində olub. Şahin bəyin dönməzliyi, prinsipiallığı hakimiyyətin ona qarşı daha sərt davranmağından da görünür. Şahin bəyin, cəzaçəkmə müəssisəsindən verdiyi müsahibəni oxuyandan sonra bir daha onunla qürur duydum, onunla bir partiyada olduğum, onunla eyni mənəvi dəyərləri paylaşdığım üçün özümü çox xoşbəxt hiss etdim”, – deyir Gözəl xanım.
“Tarixdə Şahin bəy qalacaq!”
Gözəl xanımla Şahin bəy barəsində çox söhbət etdik. Avtobus isə nədənsə bu dəfə daha sürətlə şütüyürdü. Yolumuzun üstündə tıxac yox idi. Şahin Həsənli haqda çox söhbət eşitmək istəyirdik. Ancaq…
Və beləcə tez bir zamanda nəşriyyatın qarşısındakı dayanacağa çatırıq. Avtobusdan düşəndə isə Gözəl xanım uca səslə “Şahin bəyə qarşı ədalətsizlik edən, onu günahı olmadan həbsdə saxlayan hakimiyyət utansın! Tarix xalqın sərvətini talayan oğru, rüşvətxor hakimiyyətdən yox, Şahin bəy kimi qəhrəmanlardan yazacaq” deyir.
Marşrutdakılar isə başını aşağı salıb, öz işlərində idi…
Ramin DEKO
