Kemiş baş nazirin Milli Qəhrəman adını geri qaytarılması barədə müraciəti ilə bağlı ilginc məlumatlar
Sabiq baş nazir Sürət Hüseynov Milli Məclisin sədri Oqtay Əsədova müraciət edib. Müraciətin bir surəti də “Azadlıq” qəzetinə daxil olub. Sürət Hüseynov müraciətində iddia edib ki, Milli Qəhrəman adının ondan alınması zamanı qanun pozuntularına yol verilib. Ona görə də Surət Hüseynov Milli Qəhrəman adının ona qaytarılmasına dair müraciətinin Milli Məclisdə müzakirəyə çıxarılmasını, onun qəhrəman adından məhrum edilməsi haqda qərarın ləğv edilməsini və Milli Qəhrəman adının ona qaytarılmasını istəyib.
Xatırladaq ki, Surət Hüseynova Milli Qəhrəman adı 1992-ci il oktyabrın 8-də mərhum eks-prezident Əbülfəz Elçibəyin fərmanı ilə verilib. Həmin dövrdə Surət Hüseynov baş nazirin müavini, prezidentin Qarabağ üzrə fövqəladə səlahiyyətli nümayəndəsi, ordunun korpus komandiri vəzifələrində çalışıb. Sürət Hüseynov həmçinin 1993-cü il 4 iyun qiyamının əsas rəhbəri olub. Onun rəhbərliyi altında Azərbaycanda baş qaldırmış hərbi qiyam AXC hakimiyyətinin yıxılması ilə nəticələnib. Bundan sonra Azərbaycan prezidentinin səlahiyyətlərini icra edən parlament sədri Heydər Əliyevin imzaladığı 1993-cü il 30 iyun tarixli fərmanla Surət Hüseynov baş nazir təyin olunub.
1994-cü il oktyabrın 6-da Surət Hüseynov Milli Məclis üzvlüyündən, oktyabrın 7-də isə baş nazir vəzifəsindən azad edilib.
1994-cü il oktyabrın 14-də Milli Məclis Surət Hüseynovun cinayət məsuliyyətinə cəlb olunmasına, barəsində həbs qətimkan tədbiri seçilməsinə razılıq verilməsi və Azərbaycanın Milli Qəhrəmanı adından məhrum edilməsinin tövsiyə olunması haqqında qərar qəbul edib.
1997-ci ildə həbs edilən S.Hüseynov məhkəmənin qərarı ilə ömürlük həbs cəzasına məhkum edilib. 2004-cü il martın 17-də prezident Ilham Əliyevin imzaladığı əfv fərmanı ilə Surət Hüseynov azadlığa buraxılıb.
“Azadlıq”a daxil olan məlumatlara görə, Azərbaycan-Rusiya münasibətlərində gərginliyin yaşandığı bir ərəfədə Sürət Hüseynovun fəallaşması təsadüfi deyil. Məlumatlarda iddia olunur ki, Sürət Hüseynov yenidən Kremlin Azərbaycanla bağlı layihəsində yer alıb. Bildirilir ki, yaxın vaxtlarda bir çox Qarabağ veteranları Sürət Hüseynovun Milli Qəhrəman adının qaytarılması ilə bağlı müraciətlər edəcək. Bütün bunlar keçmiş baş nazirin reablitasiyası üçün lazımdır.