2011-ci il mayın 6-da Bakıda keçirilmiş “Hicaba azadlıq” aksiyasına görə 1 il 6 ay müddətinə azadlıqdan məhrum olunmuş ilahiyyatçı Taleh Bağırov “Media forum” saytına açıqlama göndərib. Taleh Bağırov Penitensiar Xidmətin Ramanadakı 16 saylı Cəzaçəkmə Müəssisəsində saxlanır.
O yazır: “Son illər Azərbaycanda islami oyanış sürətlə böyüməkdədir. Xüsusilə gənclərimizin islam dininə bağlılığı artdıqca hakimiyyətin dinimizə qarşı ögey münasibətinə etirazlar genişlənir. 5 oktyabr 2012-ci ildə inanclı insanların keçirdiyi növbəti “Hicaba azadlıq” aksiyası bir daha sübut etdi ki, mübarizə meydanına çıxan gəncləri heç bir hədə-qorxu ilə kənarlaşdırmaq mümkün deyil. Hakimiyyətin islam dininə və onun atributlarına laqeydliyi, verdiyi əsassız qərarlar, millətə zülm və rəzalət insanları bezdirib.
5 oktyabr aksiyasında hakimiyyət polisin qanunsuz hərəkətlərinə inanclı insanların dirənişinin şahidi oldu. Baş verən qarşıdurmanın gözlənilməz nəticələri hakimiyyəti təşvişə saldı, hakim rejimin sütunlarını silkələdi. Təbii ki, hakimiyyət düşdüyü siyasi böhrandan çıxmaq üçün baş verənlərin arxasında xarici qüvvələrin olduğunu bəyan etdi, növbəti dəfə ictimaiyyətə yalan məlumat verdi. Hakimiyyət aksiyanın mənbəyi kimi Suriyanın üzərində dayandı.
Mətbuatda yazıldığı kimi, 5 oktyabr aksiyası ciddi şəkildə hazırlansa da, aksiyanın özündə tanınmış ilahiyyatçılar və ruhanilər iştirak etmirdilər. Belə bir vəziyyətlə qarşılaşdığından hakimiyyət çıxış yolu tapa bilmirdi. Əlacsız qalaraq həbs edilənlərdən Maştağa sakini olan 4 nəfəri 5 oktyabr aksiyasının təşkilatçısı kimi təqdim edilər. Lakin tezliklə məlum oldu ki, həmin 4 nəfərin heç birinin dini təhsili yoxdur və onların heç biri Suriyada olmayıb.
Növbəti uğursuzluqdan sonra hakimiyyət mənsubları ölkə vətəndaşları arasında Suriyada dini təhsil almış ilahiyyatçı axtarışına başladılar. Suriyada dini təhsil almış ilahiyyatçı Cavid Məmmədov həbs olundu. Belə bir nəticə həm hüquq mühafizə orqanlarına sərf edirdi, həm də onları hakimiyyət rəhbərləri yanında üzüqaralıqdan qurtarırdı. Amma bu cəhd də uğursuzluqla nəticələndi. Çünki təhqiqat zamanı məlum oldu ki, 5 oktyabr aksiyasında Cavid Məmmədov iştirak etməyib. Ümumiyyətlə, onun bu cür aksiyalara münasibəti fərqlidir. Məlum oldu ki, Cavid Məmmədov qızının təhsilsiz qalmaması üçün övladının məktəbə başıaçıq getməsinə də razılıq verib, ölkədə hicab probleminin hüquqi müstəvidə, dinc danışıqlar yolu ilə həll edilməsinə tərəfdardır.
Hakimiyyətə tövsiyəmiz budur ki, boş yerə özlərini yormasınlar. Bu aksiyalar Azərbaycanın daxilindən qaynaqlanır, inanclı insanların Allah-təalaya, islam peyğəmbərinə və onun əhli-beytinə olan sevgilərindən, “Qurani-Kərim”ə olan məhəbbət və rəğbətlərindən yaranır. Yaxşısı budur hakimiyyət özünü daha da ağır vəziyyətə salmasın, əksinə, insanların ehtiyaclarına, tələblərinə diqqətlə yanaşaraq onları həll etsin, ölkədə haqq-ədaləti bərqərar etsin”.
