Daş döşəmələr dördüncü dəfə dəyişdirilir
Bulvar kimi tanıdığımız Dənizkənarı Parkda yeni salınmış daş örtüklər yenə dəyişdirilir. Son iki ildə Bulvarda bu, dördüncü dəyişiklikdir. Əsasən Azadlıq meydanı ilə üzbəüz olan hissədə daş örtüklər sıradan çıxıb.
Ötən gün sözügedən ünvanda olduq. Təxminən 150 metr ərazinin daş örtüyündə problem yaranıb. Bundan başqa, həmin ünvanın yaxınlığında bir neçə yerdə sahəsi üç-dörd kvadrat metr olan yerlərin də daş örtükləri çıxarılaraq yeniləriylə əvəzlənir.
Ərazidə işləyən fəhlələrlə söhbət zamanı məlum oldu ki, daşların çıxarılmasına yağış suları səbəb olub. Belə ki, yağış yağan zaman yerə yaxşı döşəməyən daş örtüklər çökməyə başlayıb.
Fəhlələr deyir ki, təkcə yağış suları çöküntü yaratmayıb. Ətrafdakı ağacları suvarmaq üçün su maşınları və başqa ağır tonnajlı “KaMAZ”lar keçdiyi üçün belə bir problem yaranıb.
Dəyişdirilən daşlara baxanda onların yararsız olduğu hiss olunmur. Əksinə, onları çıxarıb yerini doldurub yenidən döşəmək də olar. Ancaq nədənsə fəhlələrə elə göstəriş verilib ki, yeniləri döşənsin. “Köhnə” daşlar isə Dənizkənarı Bulvar Idarəsinin anbarına daşınır.
Fəhələlər işə məsul Malik adlı adamın olduğunu bildirdilər. Dedilər ki, Malik ərazidədir. Ancaq işə məsul şəxsi çox axtarsaq da, onu “gördüm” deyən olmadı.
Qeyd edək ki, genişləndirilmə ilə bağlı aparılan yenidənqurma və abadlaşdırma işlərinin davam etdirilməsi üçün Dənizkənarı Bulvar Idarəsinə Prezidentinin Ehtiyat Fondundan 5 milyon manat ayrılıb.
Ramin DEKO
