Hakim partiyanın rəhbərliyi sabiq deputatı təşkilatdan uzaqlaşdırmağa cəsarət etmir
Sabiq deputat Gülər Əhmədovanın YAP-dan çıxarılması düyünə düşüb. Indi də bu məsələ ilə bağlı məsuliyyət Gülər Əhmədovanın üzvü olduğu Bakı Dövlət Universiteti üzrə ərazi təşkilatının üzərinə atılıb. Bundan əvvəl bildirilirdi ki, sabiq deputatın YAP-daq qalıb-qalmaması məsələsi ilk partiya təşkilatında müzakirə olunmalıdır.
Gülər Əhmədova isə hakim partiyanın Yasamal rayon təşkilatında qeydiyyatındadır. YAP-ın Yasamal rayon təşkilatında bu məsələyə baxılmasının yubanması isə sədr Fikrət Ismayılovun səhhətilə bağlı ölkədə olmaması ilə izah edilirdi. Fikrət Ismayılov artıq bir müddətdir ki, ölkəyə qayıdıb. Və ortaya yuxarıda qeyd etdiyimiz növbəti bəhanə çıxıb.
BDU üzrə ərazi təşkilatının sədri professor Ismayıl Əliyev də yeni bəhanə tapıb. O, modern.az-a bildirib ki, məsələyə Baş Prokurorluqda açılan cinayət işi başa çatandan sonra son qoyulacaq: “Bizim təşkilatda Gülər Əhmədova ilə bağlı məsələyə cinayət işi başa çatandan sonra baxılacaq. Təbii ki, biz onun partiyadan çıxarılıb-çıxarılmaması məsələsini mütləq müzakirə edəcəyik. Bu millətin, dövlətin problemidir. Məhkəmə qərarını versin qutarsın və yaxud son nəticə açıqlansın, ondan sonra Gülər Əhmədovanın partiya məsələsi gündəyilə gətiriləcək?.
Açıq-aydın görünür ki, YAP Gülər Əhmədova ilə bağlı qərar verməkdən ehtiyat edir. Halbuki sabiq deputatla bağlı məlum video yayılandan sonra hakim partiyanın sədr müavini Əli Əhmədov keçmiş həmkarını dələduz adlandıraraq bəyan etmişdi ki, o, Milli Məclisdə YAP-ı təmsil edə bilməz. Gülər Əhmədova hazırda deputat kimi YAP-ı təmsil etməsə də, sıravi vətəndaş olaraq hakim partiyanın təmsilçisidir. Əli Əhmədovla yanaşı YAP-ın ünlü simaları Kərim Kərimov, Siyavuş Novruzov, Mübariz Qurbanlı, Hadı Rəcəbli və digərləri Gülər Əhmədovanı sərt şəkildə tənqid etmişdilər. Hakim partiyanın orqanı olan “Səs” qəzeti isə bir qədər də uxağa gedərək sabiq deputatın ünvanına təhqirlər yazmışdı. Bəs bu halda Gülər Əhmədovanın YAP-da saxlanılması nədən irəli gəlir?
Görünür, sabiq deputatın “ağzımı açdırmayın” hədəsi YAP-ın rəhbərliyini təşvişə salıb. Ona görə də Gülər Əhmədovanın hakim partiya sıralarından xaric edilməsilə bağlı qərar verə bilmirlər. Halbuki YAP-ın Nizamnaməsinin 7-ci maddəsində göstərilir ki, partiyanın üzvləri Nizamnamənin müddəalarına əməl etməyə və onun rəhbər orqanlarının qərarlarını yerinə yetirməyə borcludurlar. Bu tələblər yerinə yetirilmədikdə, ilk partiya təşkilatı və partiyanın digər RƏHBƏR ORQANLARI (seçdirmə bizimdir) tərəfindən onların haqqında partiya üzvlüyündən azad edilməyə qədər intizam tədbirləri görülə bilər. Deməli, Gülər Əhmədovanın məsələsi YAP-ın Idarə Heyətində və yaxud Siyasi Şurasında da müzakirə edilə bilər. Sadəcə hansısa səbəbdən YAP-ın rəhbərliyində təmsil olunan şəxslər məsuliyyəti öz üzərlərindən atmağa çalışırlar.
