Dağıstanın Tabasaran rayonundakı meşə massivində yaraqlılarla polislər arasında döyüş gedir. Lent.az-ın yerli KİV-ə istinadən verdiyi məlumata görə, adıgedən rayonun Çulat və Turaq kəndləri yaxınlığındakı meşə massivində yaraqlıların 6-7 nəfərlik qrupu ilə polislər arasında atışmada ölən və yaralanalar var.
Məlumata görə, əraziyə əlavə qüvvələr göndərilir. Onların arasında Dərbənd polisinin 2 azərbaycanlı əməkdaşı da olub, onların ikisi də ağır yaralanıb.
Federal qüvvələr və yerli polis ətrafa minalar döşəndiyindən meşənin dərinliyinə kimi hərəkət etməyiblər. Hazırda ərazi üzərində döyüş helikopterləri əməliyyata başlayıb.
Hüquq-mühafizə orqanlarının məlumatına görə, yaraqlılar avtomat və pulemyotlarla silahlanıblar.
Hazırda əməliyyat davam edir.
Qeyd edək ki, azərbaycanlıların da kompakt yaşadığı Tabasaran rayonu Dərbəndlə sərhəddə yerləşir.
