Anatoli Çubays ölkədə siyasi durğunluğun gücləndiyini iddia edir
“Rosnano” korporasiyasının rəhbəri Anatoli Çubays Rusiyanın siyasi həyatını gözləyən hadisələrlər bağlı proqnozlarını açıqlayıb. Çubaysın sözlərinə görə, ölkədə etirazlar dalğası artmaq üzrədir və keçiriləcək növbəti aksiyalara 500 mindən çox insanın çıxması real görünür. “İtoqi” jurnalına müsahibə verən “Rosnano” rəhbəri son günlər Rusiya hakim dairələrində və Kremlə yaxın mənbələrin ölkədəki etirazların sənigdiyinə dair iddiaları əsassız adlandırıb.
Anatoli Çubays hökumətin siyasi islahatları ləngitməsinin ölkə üçün uğurlu gələcək verməyəcəyini deyib. Onun sözlərinə görə, davam edən avtoritar idarəçilik və repressiya siyasəti narazı kütlənin daha da qəzəblənməsinə səbəb ola bilər. Keçirilən əvvəlki aksiyalara on minlərlər insan çıxırdısa bundan sonra belə nümayişlərə yüz minlərin qatılması istisna olunmur. “Rosnano” rəhbəri Rusiyanın iqtisadi islahatların sürətləndirilməsinin vacibliyini də vurğulayıb. O, deyib ki, iqtisadi inkişafı ləngitmək siyasi durğunluğu artırır.
