Hələbdə isə iki partlayış törədildi: 17 ölü, 40 yaralı…
Suriyada müxaliflərlə hökumət qüvvələri arasında şiddətli döyüşlər davam edir. Etirazçılar Bəşər Əsəd rejimini devirmək səylərini gücləndirib. Ölkənin iqtisadi və siyasi cəhətdən ən önəmli mərkəzi sayılan Hələb şəhərində bazar günü ardıcıl 2 partlayış törədilib.
Rəsmi xəbər agentliyinin verdiyi məlumata görə, xəstəxana və məktəb yaxınlığında baş vermiş partlayışlar 17 nəfərin həyatına son qoyub, azı 40 nəfər yaralanıb. Partlayışlara görə məsuliyyəti müxalif hərbçilərdən ibarət Azad Suriya Ordusunun “Zadəgan Hələb” briqadası üzərinə götürüb. Fəallar hökumət qüvvələrinə hücum zamanı 200-ə yaxın əsgərin öldürüldüyünü və yaralandığını açıqlayıb.
Hökumət qüvvələri ölkənin bir çox əyalətlərində, o cümlədən Dəməşqin şəhərkənarı ərazilərində hava əməliyyatlarını davam etdirib. Yerli Koordinasiya Komitələri bazar günü törədilən zorakılıqların 17 uşaq və 11 qadın da daxil olmaqla, ümumilikdə 160 nəfərin həyatına son qoyduğunu xəbər verir.
Üsyançılar paytaxt Dəməşqin ətraf rayonlarına doğru irəliləməyə başlayıb. Hökumət qüvvələri müxaliflərin paytaxta girməsinə mane olmağa çalışıb. Tərəflər arasında yaşanan döyüşlər zamanı üsyançıların bəzi strateji əhəmiyyətli bölgələrdə partlayışlar törətdiyi bildirilir. Hökumət rəsmilərinin sözlərinə görə, üsyançılar orduya məxsus helikopteri vurublar. Qarşıdurmaların Həma və Homs şəhərlərində də intensiv xarakter aldığı deyilir.
Bu arada, Azad Suriya Ordusunun hərbi şurasının başçısı Mustafa Əl Şeyx Bəşər Əsəd rejiminin süqutuna ən çoxu 4 ay vaxt qaldığını açıqlayıb. Şeyx üsyançıların Suriyada mövqelərini getdikcə gücləndirdiklərini və döyüşlərdə daha çox qələbələr qazandığını bildirib. Onun sözlərinə görə, artıq Bəşər Əsədə sadiq ordu quru döyüşlər aparmaqda gücsüz vəziyyətə gəldiyindən, yalnız qırıcı təyyarələr və tanklardan istifadə etməyə məcbur olub.
Bütün bunlarla yanaşı, Avropa Birliyinin xarici siyasət və təhlükəsizlik məsələləri üzrə ali komissarı Ketrin Eşton Suriyanı tərk edərək qonşu ölkələrə sığınan suriyalı qaçqınlara 50 milyon avro məbləğində humanitar yardım ayrıldığını bildirib. O, Bəşər Əsədin hakmiyyəti tərk etməsi məsələsində mövqelərinin dəyişməz olduğunu da vurğulayıb.
