Kəmaləddin Heydərovla Rövnəq Abdullayev arasındakı savaşı ARDNŞ prezidentinin xeyrinə kim yönəltdi?
Bu günlərdə ölkə başçısı Ilham Əliyev “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nı təsdiqləyib. Həmin fəaliyyət planında Azərbaycanda hündürmətəbəli yeni yaşayış binalarının qazla təminamıt məsələsinin 2 ilə həll olunması nəzərdə tutulur.
Bu isə hökumətdə iki məmur arasında ziddiyyətləri daha da alovlandırıb. Söhbət fövqəladə hallar naziri Kəmaləddin Heydərovla Azərbaycan Dövlət Neft Şirkətinin (ARDNŞ) rəhbəri Rövnəq Abdullayevdən gedir. Məsələ burasındadır ki, yeni tikilən hündürmərtəbəli binaların qazla təmin olunması üçün onlar dövlət qeydiyyatına alınmalıdır. Bunun üçün isə Fövqəladə Hallar Nazirliyinin rəyi olmalıdır. Amma Kəmaləddin Heydərov bu rəyi tikinti şirkətlərinə xüsusi şərtlərlə vermək istəyir. Şirkət sahibləri isə “fövqəlnazir”in şərtini qəbul etmirlər. Bu baxımdan da binaların dövlət qeydiyyatına alınması ləngiyir və həm də onların qaz çəkilişi müşkülə çevrilir. Bir neçə il əvvəl Rövnəq Abdullayev həmin binalarda yaşayışın olduğunu əsas gətirərək onların qazla təminatı məsələsinin zəruri olduğunu vurğulamışdı. ARDNŞ prezidentinin bu açıqlaması isə Kəmaləddin Heydərovu hiddətləndirmişdi. Çünki binaların qazla təminatı, artıq onların dövlət qediyyatına alınması anlamına gəlir. Rövnəq Abdullayev o zaman çox çalışsa da, istəyinə nail ola bilmədi. Amma indi onun bu təklifi Milli Fəaliyyət Planına salınıb. Bu da səbəbsiz deyil.
Iyul ayında belə bir xəbər yayıldı ki, “Azəriqaz” Istehsalat Birliyi ölkənin qazlaşdırılması işləri ilə bağlı elan etdiyi tenderi yekunlaşdırıb. Ölkənin bütün ərazisində qazlaşdırma işlərinin aparılması tenderdə qalib gələn “Qlobal Servis” şirkətinə həvalə edilib.
Artıq “Azəriqaz”la “Qlobal Servis” arasında bununla bağlı müqavilə imzalanıb. Müqavilənin dəyəri 1 mlrd. 71 mln. 63 min manat təşkil edir. “Azadlıq”ın o zaman məlumat yaydı ki, bu şirkət bir neçə ay əvvəl yaranıb və hansısa ciddi layihələrdə adı keçmir. Hətta şirkətin veb-səhifəsi belə, yoxdur. Milyardlıq layihənin “Qlobal Servis”ə həvalə edilməsinin səbəbi şirkətin prezidentin şəxsi mühafizə xidmətinin rəhbəri Bəylər Əyyubova məxsus olması ilə əlaqədardır. Bu baxımdan ehtimal etmək olar ki, hündürmərtəbəli binaların qazla təminatı barədə qərar verilməsi Bəylər Əyyubov iradəsi əsasında baş tutub. Lakin Kəmaləddin Heydərovun asanlıqla təslim olunacağı inandırıcı görünmür. Mümkündür ki, “fövqəlnazir” tikinti şirkətlərinə qarşı hücuma keçərək ən müxtəlif vasitələrlə onları rəy almağı məcbur edəcək.
Azad
