Bakıda polis bölməsinə basqın olub. Bu barədə APA-ya Binəqədi Rayon Polis İdarəsindən məlumat verilib. Hadisə ötən gecə qeydə alınıb. Bildirilir ki, sərxoş vəziyyətdə olan naməlum şəxs əlində bıçaqla Binəqədi Rayon Polis İdarəsinin 5-ci polis bölməsinə gələrək növbədə olan polis əməkdaşlarını hədələyib. Məlumata görə, sərxoş şəxs onun əlindən bıçağı almaq istəyən iki polis əməkdaşına – polis zabitləri Seyfəddin Ağayev və Tural İbrahimova xəsarət yetirib. Sonda sərxoş şəxs zərərsizləşdirilib və həbs edilib.
Araşdırmalar zamanı polisə hücum edən şəxsin Bakı şəhər sakini, 1976-cı il təvəllüdlü Zaur Ələkbər oğlu Məmmədov olduğu müəyyənləşib. O, xalası oğlunun həbsinə etiraz olaraq bu addımı atdığını bildirib.
Faktla bağlı Binəqədi Rayon Prokurorluğu tərəfindən cinayət işi başlanıb, istintaq gedir.
