Onun sözçüsü yayılan məlumatlara aydınlıq gətirdi
Hüquq elmləri doktoru, professor, Rusiya prezidenti Vladimir Putunin dostu İlham Rəhimovun Azərbaycanda yüksək vəzifəyə, bəzi məlumatlara görə Prezident Administrasiyasının rəhbəri Ramiz Mehdiyevin yerinə gətiriləcəyi barədə xəbər yayılıb. “Hürriyyət” qəzetinin yaydığı bu xəbərdə deyilir ki, yaxın vaxtlarda Ramiz Mehdiyev İlham Rəhimovla əvəzlənəcək.
Məlumatla bağlı İlham Rəhimovun mətbuat katibi Xanoğlan Əhmədovla əlaqə saxladıq. O, qəzetdə yazılanların yalan olduğunu bildirdi. Onun sözlərinə görə, belə məlumatlara mətbuatda ara-sıra rast gəlsə də, həqiqətlə hər hansı bağlılığı yoxdur: “Əvvala, İlham müəllim siyasətlə məşğul olmadığı barədə müsahibələrində dəfələrlə öz fikirini bildirib. Digər tərəfdənsə, o hazırda siyasətlə deyil, ciddi şəkildə elmi yaradıcılıqla məşğuldur. Məlum olduğu kimi bu yaxınlarda İlham müəllimin “Cinayətkarlıq və cəza” adlı kitabının BDU-da yüksək səviyyəli təqdimatı keçirilib. Hazırda isə yekunlaşmaq üzrə olan növbəti kitabının üzərində işləyir”.
X.Əhmədov onu da bildirib ki, belə yalan dolu informasiyaların mətbuata ötürülməsi İlham Rəhimovun hakimiyyətlə münasibətlərinə kölgə salmaq, korlamaq məqsədi daşıyır: “Halbuki İlham müəllimin hakimiyyətlə münasibətlərinin normal səviyyədə olduğu hamıya bəllidir. Bunun sübutu onun iki il öncə 60 illik yubileyi münasibətilə Prezident İlham Əliyev tərəfindən “Əməkdar hüquqşünas” fəxri adına layiq görülməsidir”.
azadliq.info
