Şahzadəni canlandıran Naomi Vats çətinliklərdən danışdı
1997-ci ildə 36 yaşındaykən Parisdə faciəli yol qəzasında həyatını itirən Uels şahzadəsi Diananın həyatından bəhs edən film çəkilir. Filmdə Diananı 43 yaşlı aktrisa Naomi Vats canlandıracaq.
Vats həyatının ən çətin rolunu oynadığını deyib. İndiyə qədər bir sıra fərqli xarakterləri müvəffəqiyyətlə canlandıran Vats “Kinq Konq” və “21 qram” filmlərindəki oyunu ilə böyük uğur qazanıb. Təcrübəli aktrisa bildirib ki, Diananın özünə xas mimika və bədən dili olub, onları olduğu kimi ifadə etmək çox çətindir: “Nə qədər çalışırsan çalış, bunları birə-bir tutmaq çox çətindir”.
Filmdə Diananın öz oğlanları ilə əlaqələrindən də bəhs olunacağını deyən Vats “Onun nə qədər yaxşı bir ana olduğunu da gördüm” deyib.
Oliver Hirschbigelin çəkdiyi film 2013-ci ilin yazında ekranlara çıxacaq.
